កម្មករសំណង់នៅភ្នំពេញគេចប៉ុស្តិ៍ត្រួតពិនិត្យទៅលេងស្រុកខេត្តកំពង់ធំតេស្តមានវិជ្ជមានកូវីដ-១៩

បុរសម្នាក់ឈ្មោះ ឡេក បញ្ញា អាយុ២១ឆ្នាំ រស់នៅភូមិក្តីតាចិន ឃុំទ្រៀល ស្រុកតាំងគោកជាកម្មករសំណង់បានទៅលេងស្រុកកំណើតនៅខេត្តកំពង់ធំ បានតេស្តវិជ្ជមានកូវីដ-១៩ហើយត្រូវបានដាក់ឱ្យសម្រាកព្យាបាលនៅមន្ទីរពេទ្យបង្អែកបារាយណ៍-សន្ទុក។

យោងតាមសេចក្តីជូនដំណឹងរបស់រដ្ឋបាលខេត្តកំពង់ធំនៅថ្ងៃទី១៦ មេសានេះថា បុរសខាងលើត្រូវបានធ្វើតេស្តមានវិជ្ជមានកូវីដ-១៩ កាលពីថ្ងៃទី១៥​ មេសា ឆ្នាំ២០២១ បន្ទាប់ពីគ្រូពេទ្យយកសំណាកទៅពិនិត្យនៅវិទ្យាស្ថានសុខភាពសាធារណៈភ្នំពេញ កាលពីថ្ងៃទី១៤ មេសា។

បុរសដែលវិជ្ជមានជំងឺកូវីដ១៩នេះ ជាកម្មករសំណង់នៅអូឌឹម រាជធានីភ្នំពេញ រស់នៅក្នុងបន្ទប់ជួលម្នាក់ឯង។ កាលពីថ្ងៃទី១២ ខែមេសា ឆ្នាំ២០២១ ឈ្មោះ ឡេក បញ្ញា បានជិះម៉ូតូផ្ទាល់ខ្លួនម្នាក់ឯង ត្រលប់មកស្រុកកំណើត ដោយបានចូលទិញថ្នាំនៅផ្សារអូរឌឹម និងឈប់ចាក់សាំងនៅចោមចៅ រួចក៏បន្តដំណើររហូតដល់ខេត្តកំពង់ធំ ដោយបានគេចប៉ុស្តិ៍ត្រួតពិនិត្យទៅតាមផ្លូវទឹកឆា (តាមច្រករណ្តៅថ្ម)។ នៅពេលមកដល់ផ្ទះកម្មកររូបនេះ មិនបានប្រាស្រ័យទាក់ទងជាមួយអ្នកណាទេ ព្រោះម្តាយគាត់បានជូនដំណឹងទៅមេភូមិ ហើយក្រុមការងារសុខាភិបាលក៏បាននាំបុរសនេះទៅដាក់នៅមណ្ឌលចត្តាឡីស័កវិទ្យាល័យទ្រៀលភ្លាមៗ៕

អត្ថបទ៖ សំអឿន