អភិបាលរាជធានី ណែនាំអាជ្ញាធរសម្រួលអាជីវករដឹកគ្រឿងបរិភោគទៅផ្គត់ផ្គង់ទីផ្សារ

ភ្នំពេញ៖ អភិបាលនៃគណៈអភិបាលរាជធានីភ្នំពេញ បានណែនាំអាជ្ញាធរ និងកងកម្លាំងមានសមត្ថកិច្ចត្រូវបើកទូលាយឱ្យអាជីវករ រកស៊ីដឹកត្រី សាច់ បន្លែទៅផ្គត់ផ្គង់នៅទីផ្សារ ដោយមិនត្រូវឃាត់ពួកគាត់សួរនាំរកឯកសារច្រើនពេកទេ ព្រោះបានឃើញច្បាស់ថា ពួកគាត់ដឹកជញ្ជូនអីច្បាស់ហើយ។

ការណែនាំនេះបានធ្វើឡើង នារសៀលថ្ងៃទី១៦ មេសានេះ នៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ តាមរយៈកិច្ចប្រជុំ video conference នៅសាលារាជធានីភ្នំពេញ ដោយមានការចូលរួមពីអភិបាលខណ្ឌទាំង១៤ ស្នងការនគរបាលរាជធានីភ្នំពេញ និងមេបញ្ជាការកងរាជអាវុធហត្ថរាជធានីភ្នំពេញ ដើម្បីពង្រឹងការអនុវត្តវិធានការបិទខ្ទប់រាជធានីភ្នំពេញអោយមានប្រសិទ្ធភាព។

លោក ឃួង ស្រេង បានមានប្រសាសន៍ថា សម្រាប់រាជធានីភ្នំពេញមានគោលដៅដែលត្រូវឃាត់ការចេញ ចូលរាជធានីចំនួន៩ទីតាំងនិងចំនួន២៨ទៀតនៅកណ្តាលក្រុងសរុបទាំងអស់ ចំនួន៣៧ ដែលគណៈបញ្ជាការឯកភាព និងកងកម្លាំងប្រដាប់អាវុធបានដាក់ដើម្បីបង្ការ និងទប់ស្កាត់នូវការរីករាលដាលនៃជំងឺកូវីដ-១៩។

ជុំវិញទីតាំងដែលបានដាក់ទាំង៣៧កន្លែងនេះ លោក ឃួង ស្រេង ក៏បានជំរុញឱ្យអាជ្ញាធរដូចជាកម្លាំងពាក់ព័ន្ធត្រូវអនុវត្តការសម្រេចរបស់រាជរដ្ឋាភិបាលជុំវិញការបិទខ្ទប់រាជធានីនេះឱ្យមានប្រសិទ្ធភាពខ្ពស់ តែមិនត្រូវអនុវត្តឱ្យលើស និងខ្វះទេ។ ចំពោះការដឹកទំនិញដែលយើងឃើញថាជាគ្រឿងឧបភោគបរិភោគ បន្លែត្រីសាច់នោះ ត្រូវបើកផ្លូវអោយគាត់ធ្វើដំណើរចេញចូលទៅតាមសម្រួលទៅ។

លោក ឃួង ស្រេង បានធ្វើការណែនាំឱ្យអាជ្ញាធរខណ្ឌទាំង១៤ ក៏ដូចជាសមត្ថកិច្ចពាក់ព័ន្ធទាំងអស់ ដែលបាននឹងកំពុងដាក់គោលដៅប្រចាំការនៅគោលដៅបិទខ្ទប់នៅក្នុងរាជធានីភ្នំពេញត្រូវអនុវត្តការសម្រេចរបស់រាជរដ្ឋាភិបាលជុំវិញការបិទខ្ទប់រាជធានីភ្នំពេញរយៈពេល១៤ថ្ងៃនេះឱ្យទទួលបានជោគជ័យ៕

អត្ថបទ៖ ស្រីរ័ត្ន