តើពិតដែរទេ ដែលលោកអធិការ​ស្រុកទ្រាំង ខេត្តតាកែវ យកលុយជាង២០លានរៀលជាថ្នូនៃការដោះលែងមនុស្សនិងវត្ថុតាង

ពលរដ្ឋស្រុកទ្រាំងបានសម្តែងការសាទរចំពោះចំណាត់ការផ្លូវច្បាប់របស់កម្លាំងអធិការដ្ឋាននគរបាលស្រុក ដែលបានចុះបង្ក្រាបវង់ល្បែងសុីសងមួយកន្លែងស្ថិតនៅភូមិ តារ៉េនជោ ឃុំអង្កាញ់ ស្រុកទ្រាំង ខេត្តតាកែវ ជាមួយគ្នានោះក៏បានលេីក​ឡេីងដែរថា ហេតុអ្វីឃាត់ទុកមិនដល់២៤ម៉ោងផងទាំងមនុស្ស និងវត្ថុតាងត្រូវបានដោះលែងអស់?

ជុំវិញការដោះលែងអ្នកលេងល្បែងខុសច្បាប់ និងវត្ថុតាងបន្ទាប់ពីការបង្ក្រាបបានមួយដង្ហេីមចង្រិតនេះ ប្រភព​ព័ត៌​មាន ពីសមត្ថកិច្ចដែលសុំលាក់ឈ្មោះបានឲ្យដឹងថា រឿងនេះពិតជាមានការដោះលែងមែន ក្នុងនោះជាថ្នូរនឹងលុយ​២០លាន​រៀលបង់ឲ្យលោក ឃុត ភិន អធិការនគរបាលស្រុក។

ដោយឡែកសាច់ញាតិរបស់ភាគីខាងរថយន្តនិងម៉ូតូដែលត្រូវបានឃាត់ទុកនោះ ក៏បានបង្ហើបស្រដៀងគ្នានេះដែរថា ពេលសមត្ថកិច្ចដោះលែងមនុស្ស និងវត្ថុតាងមកវិញ គឺពួកគាត់ពិតជាបានបង់លុយជាថ្នូរនឹងការដោះលែងអស់ច្រើន​លានរៀលមែន តែមិនបានបញ្ជាក់ថាម្នាក់ៗអស់ប៉ុន្មាននោះទេ ។

លោក ឃុត ភិន អធិការនគរបាលស្រុកទ្រាំង មិនអាចទាក់ទងសុំការបំភ្លឺបានទេ នៅព្រឹកថ្ងៃទី១៧ ខែមេសានេះ ដោយហៅទូរស័ព្ទមិនចូល។

ចំណែកលោក ឈួន ផាន់នី អភិបាលស្រុកទ្រាំងបានឲ្យដឹងតាមទូរស័ព្ទនៅព្រឹកថ្ងៃទី១៧ ខែមេសានេះដែរថា លោកមិនបានដឹងទេជុំវិញករណីនេះ លោកបានបន្ថែមថា បើលោកអធិការស្រុកធ្វើបែបនេះគឺកុនហើយ។

គួររំលឹកថា មុនទេវតាឆ្នាំថ្មីចុះកាលពីយប់ថ្ងៃ ទី១៣ ខែមេសា ឆ្នាំ២០២១ វេលសាម៉ោង២២និង៣០នាទីកម្លាំងអធិការនគរបាលស្រុកទ្រាំងបានចុះបង្ក្រាបការលេងល្បែងស៊ីសងខុសច្បាប់មួយករណី(អាប៉ោង)នៅក្បែរម៉ុងខ្មោច និងបាន​រឹបអូសវត្ថុតាងមានរថយន្តចំនួន០៤ គ្រឿង ម៉ូតូ០៣គ្រឿងនិងមនុស្សចំនួន០១នាក់ផងដែរយកមកអធិការដ្ឋានស្រុក និងបានដោះលែងវិញអស់នៅល្ងាចថ្ងៃទី១៤ ខែមេសា ដែលមានប្រភពច្បាស់ការថា ជាថ្នូរនិងប្រាក់វ៉ៃអួប្រមាណជា២០លានរៀល៕

អត្ថបទ ៖ វីរៈ