ក្រុង​តាខ្មៅ​ យក​ទីលានបាល់ទាត់ ធ្វើជាផ្សារលក់ដូរ​បណ្តោះ​អាសន្ន​

អាជ្ញាធរ​ក្រុង​តាខ្មៅ​ខេត្តកណ្តាល​បាន​ជ្រើសរើស យកទីលាន​បាល់​ទាត់ ធ្វើជាកន្លែង​បន្លែត្រីសាច់ជាបណ្តោះអាសន្ន ដើម្បីទប់ស្កាត់​ការ​ឆ្លងរីករាលដាលនៃកូវីដ១៩។

លោក គង់ សោភណ្ឌ័ ចុះត្រួតពិនិត្យទីតាំងលក់បន្លែត្រីសាច់បណ្តោះអាសន្ននៅក្រុងតាខ្មៅ ខណៈផ្សាររដ្ឋក្នុងក្រុងតាខ្មៅត្រូវបានបិទដើម្បីទប់ស្កាត់បញ្ហាកូវីដ នៅថ្ងៃទី១៧ ខែមេសានេះ។ ការ​ចុះត្រួតពិនិត្យ និងពង្រឹងសណ្តាប់​ធ្នាប់​សាធា​រណៈនៅទីតាំងសម្រាប់ឲ្យបងប្អូនអាជីវករផ្សារតាខ្មៅ លក់ដូរជាបន្លែ ត្រីសាច់ជាបណ្ដោះអាសន្ន ស្ថិតនៅកីឡដ្ឋានខេត្តកណ្ដាល ក្នុងក្រុងតាខ្មៅ ក្នុងអំឡុងពេលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ រយៈពេល១៤ថ្ងៃនេះ ដើម្បីចូលរួមទប់ស្កាត់ការឆ្លងរាលដាល នៃជម្ងឺកូវីដ-១៩ តាមសេចក្តីសម្រេចលេខ៤៩ សសរ ចុះថ្ងៃទី១៤ ខែមេសា ឆ្នាំ​២០២០ របស់រាជរដ្ឋាភិបាលកម្ពុជា។

ខណៈចុះពិនិត្យទីតាំងខាងលើនេះឯកឧត្តមអភិបាលខេត្ត បានធ្វើការណែនាំដល់អាជីវករ ដែលកំពុងលក់នៅទីនេះទាំងអស់ ត្រូវរក្សាអនាម័យតាមការណែនាំរបស់ក្រសួងសុខាភិបាល ដូចជាការពាក់ម៉ាស និងលាងដៃជាមួយអាលកុលឲ្យបានញឹកញាប់ ត្រូវលក់ដូរនៅតាមទីតាំងដែលអាជ្ញាធរបានកំណត់។ ជាពិសេសត្រូវមានសណ្តាប់ធ្នាប់ល្អក្នុងពេលលក់ដូរ លក់តែទំនិញណាដែលមានការចាំបាច់ដូចជា ត្រី សាច់ប៉ុណ្ណោះ។ជាមួយគ្នានេះដែរអាជ្ញាធររបស់យើងដែលប្រចាំការនៅទីនេះត្រូវណែនាំដល់ប្រជាពលរដ្ឋដែលមកទិញទំនិញត្រូវតែអនុវត្តឲ្យបានត្រឹមត្រូវតាមវិធានអនាម័យរបស់ក្រសួងសុខាភិបាល ហើយការទិញទំនិញទៀតសោត ត្រូវឲ្យបានលឿនឆាប់ត្រឡប់ទៅផ្ទះវិញ និងកុំមកមនុស្សច្រើនពេកក្នុងពេលតែមួយ ។