ព័ត៌មានជាតិ

ក្រសួងសេដ្ឋកិច្ច បញ្ជាក់ពីពលរដ្ឋ ដែលត្រូវទទួលបានជំនួយគាំពារសង្គម ក្នុងព្រឹត្តិការណ៍ ២០ កុម្ភៈ

បានផុស

៤ years មុន

នៅ

ថ្ងៃសៅរ៍ ១៧ មេសា ២០២១

ដោយ

ក្រសួងសេដ្ឋកិច្ច និងហិរញ្ញវត្ថុ នៅថ្ងៃនេះ បានចេញសេចក្ដីសម្រេច ស្ដីពីយន្ដការ និងនីតិវិធី នៃការអនុវត្ដវិធានការគោលនយោបាយ អន្ដរាគមន៍ជំនួយសង្គម របស់រាជរដ្ឋាភិបាល ដើម្បីគាំពារប្រជាពលរដ្ឋ ដែលរងគ្រោះ ឬរងផលប៉ះពាល់ធ្ងន់ធ្ងរ ពីជំងឺកូវីដ-១៩ ក្នុងព្រឹត្ដិការណ៍ ២០កុម្ភៈ នេះបើយោងតាមសេចក្តីសម្រេច ចុះថ្ងៃទី១៧ ខែមេសា ឆ្នាំ២០២១។

សេចក្តីសម្រេចរបស់ក្រសួងសេដ្ឋកិច្ច និងហិរញ្ញវត្ថុ ប្រការ១ បានបញ្ជាក់ថា សេចក្តីសម្រេចមានគោលបំណងកំណត់យន្តការ និងនីតិវិធីដាក់ឲ្យអនុវត្តវិធានការ អន្តរាគមន៍ជំនួយសង្គម របស់រាជរដ្ឋាភិបាល ដើម្បីគាំពារប្រជាពលរដ្ឋ ដែលរងគ្រោះ ឬរងផលប៉ះពាល់ធ្ងន់ធ្ងរពីជំងឺកូវីដ-១៩ ក្នុងព្រឹត្តិការណ៍២០ កុម្ភៈ ២០២១។ ប្រការ២ បានបញ្ជាក់ថា ប្រជាពលរដ្ឋ ដែលទទួលបានការគាំពាររួមមាន៖ គ្រួសារមានជីវភាពលំបាក រស់នៅក្នុងរាជធានីភ្នំពេញ និងក្រុងតាខ្មៅ ដែលត្រូវបានអនុវត្តវិធានការបិទខ្ទប់, គ្រួសារដែលមានសមាជិកទទួលរងជំងឺកូវីដ-១៩ តែមិនមានអ្នកស្លាប់ នៅទូទាំងប្រទេស, គ្រួសារដែលមានសមាជិកស្លាប់ ដោយសារជំងឺកូដ-១៩ នៅទូទាំងប្រទេស។

បើតាមក្រសួងសេដ្ឋកិច្ច និងហិរញ្ញវត្ថុ បញ្ជាក់ថា គ្រួសារមានជីវភាពលំបាករស់នៅក្នុងរាជធានីភ្នំពេញ និងក្រុងតាខ្មៅ ដែលត្រូវបានអនុវត្តវិធានការបិទខ្ទប់, គ្រួសារដែលមានសមាជិកទទួលរងជំងឺកូវីដ-១៩ តែមិនមានអ្នកស្លាប់ នៅទូទាំងប្រទេស និងគ្រួសារដែលមានសមាជិកស្លាប់ដោយជំងឺកូវីដ-១៩ នៅទូទាំងប្រទេស ត្រូវទទួលបានការឧបត្ថម្ភសាច់ប្រាក់ចំនួន១ លើកតែប៉ុណ្ណោះ។

ក្នុងនោះគ្រួសារដែលមានសមាជិក១នាក់ នៅរាជធានីភ្នំពេញ និងក្រុងតាខ្មៅទទួលបាន១៦ ម៉ឺនរៀល មានសមាជិក២នាក់ ឬ៣នាក់ទទួលបាន២០ម៉ឺនរៀល ចាប់ពី៤ នាក់ឡើងទៅទទួលបាន២៤ ម៉ឺនរៀល។ ចំណែកពលរដ្ឋ ដែលរស់នៅតាមទីប្រជុំជន តាមខេត្ត និងជនបទទូទាំងប្រទេស ក៏ទទួលបានដូចគ្នានេះដែរ៕

ដោយ ៖ កោះកែវ