មនុស្ស៨នាក់មិនពាក់ម៉ាសត្រូវបានកម្លាំងស្រុកព្រៃនប់ឃាត់ខ្លួនធ្វើការពិន័យ

ខេត្តព្រះសីហនុ៖ កម្លាំងគណៈបញ្ជាការឯកភាពស្រុកព្រៃនប់ បានធ្វើការឃាត់ខ្លូនមនុស្សចំនួន០៨នាក់ដែលមិនអនុវត្តកាតព្វកិច្ចពាក់ម៉ាស នាំខ្លូនយកទៅធ្វើការកិច្ច សន្យា អប់រំ និងពិន័យអន្តរការណ៍ នាថ្ងៃទី១៨ ខែមេសា ឆ្នាំ២០២១នេះ។

មនុស្សចំនួន០៨នាក់ខាងលើមាន ១ ជួន ណូ ភេទប្រុស ២ ផឹម ហាណា ភេទប្រុស ៣ ផាត ពិសី ៤ សៀន សុភា ភេទស្រី ៥ ម៉ៅ រស្មី ភេទប្រុស ៦ ភាព ជំនោ ៧ ហាន ពិទូ ភេទប្រុស និងទី៨ លី សារីត ភេទប្រុស។

មនុស្សទាំង៨នាក់ខាងលើអាចប្រឈមនឹងការពិន័យអន្តរការណ៍ បើតាមយោងតាមអនុក្រឹត្យលេខ ៣៧ អនក្រ.បក ស្តីពីវិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។

ត្រង់មាត្រា១៩ បានកំណត់ថា “ត្រូវពិន័យអន្តរការណ៍ពី ២០០,០០០(ពីរសែន)រៀល ទៅ ១,០០០,០០០(មួយលាន)រៀល ចំពោះបុគ្គលដែលមិនអនុវត្តនូវកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព និងត្រូវពិន័យអន្តរការណ៍ពី ១,០០០,០០០ (មួយលាន)រៀល ទៅ ៥,០០០,០០០(ប្រាំលាន)រៀលចំពោះអ្នកទទួលខុសត្រូវរៀបចំការជួបជុំមនុស្ស ឬសកម្មភាពសង្គមដទៃទៀតដែលមិនគោរពវិធានការគម្លាតសុវត្ថិភាព”។

ប្រជាពលរដ្ឋគ្រប់រូបមានសិទ្ធិណែនាំអ្នកនៅជុំវិញខ្លួនឱ្យអនុវត្តនូវកាតព្វកិច្ចពាក់ម៉ាស និងកាតព្វកិច្ច រក្សាគម្លាតសុវត្ថិភាព ដើម្បីបានចូលរួមទប់ស្កាត់ការឆ្លងរាលដាលនៃជំងឺកូវីដ-១៩។ ចំពោះជនដែលប៉ុនប៉ង និង បំផ្លាញសុខភាពសាធារណៈរបស់ជាតិ យើងត្រូវចាត់វិធានការតាមផ្លូវច្បាប់យ៉ាងម៉ឺងម៉ាត់បំផុត និងគ្មានការលើក លែង។

ជាមួយគ្នានេះ រដ្ឋបាលខេត្តព្រះសីហនុ សូមសូមក្រើនរំលឹកដល់ប្រជាពលរដ្ឋទាំងអស់ ត្រូវចូល រួមសហការអនុវត្តឱ្យបានខ្ជាប់ខ្ជួននូវគោលការណ៍ការណែនាំរបស់ក្រសួងសុខាភិបាល និងវិធានការ ៣កុំ ៣ការ ពារ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩នៅក្នុងសហគមន៍៕

អត្ថបទ៖ កោះពស់