កម្មករ​រោងចក្រម្នាក់ ចេញពីភ្នំពេញ មកដល់កំពង់ចាម​ ជួបជុំ​ផឹកស៊ី តេស្តមានកូវីដ១៩

សេចក្តីប្រកាសព័ត៌មានរបស់រដ្ឋបាលខេត្តកំពង់ចាមស្តីពីករណីរកឃើញវិជ្ជមានកូវីដ-១៩ លើបុរសជនជាតិខ្មែរ អាយុ ២៦ឆ្នាំ ជាកម្មកររោងចក្រសានសឺង នៅរាជធានី​ភ្នំពេញ មានស្រុកកំណើត​នៅភូមិថ្មី(ខ) ឃុំរកាគយ ស្រុកកងមាស ខេត្តកំពង់ចាម។

បើ​តាមការ​បញ្ជាក់ពីអាជ្ញាធរ​ខេត្តកំពង់ចាម នៅថ្ងៃ ១៣ មេសា ២០២១ បុរសរូប​នេះបានធ្វើដំណើរពីភ្នំពេញតាមម៉ូតូជាមួយ​មិត្តភ័ក្រ​ពេលមកដល់ស្រុកកំណើត​នៅថ្ងៃ​ដដែល បានជួបជុំផឹកស៊ី​ជាមួយ​មិត្តភ័ក្រ​បង​ប្អូន។

នៅថ្ងៃ ១៩ ខែមេសា ឆ្នាំ​២០២១ លទ្ធផល​បញ្ជាក់​ពី​វិទ្យាស្ថានសុខភាព​សាធារណៈ​បុរស​រូប​នេះ​មានវិជ្ជមានកូវីដ ១៩។ ក្រោយ​ទទួល​បាន​ព័ត៌មាន អាជ្ញាធរខេត្តកំពង់ចាមបាន​បញ្ជូន​បុរស​រូប​នេះ​យកទៅព្យាបាល​នៅ​មន្ទីរពេទ្យ​ខេត្ត និង​ស្រាវជ្រាវ​​រកអ្នកពាក់ព័ន្ធផ្ទាល់បាន​ចំនួន ១៤ នាក់ និង​កំពុង​បន្ត​រុករកអ្នក​ប៉ះពាល់ប្រយោលដទៃ​ទៀត៕