ព័ត៌មានជាតិ

គិតត្រឹមរសៀលថ្ងៃនេះ មានអាជីវករផ្សារនាគមាសឆ្លងជំងឺកូវីដ១៩ កើនឡើងដល់ជិត១០០នាក់

បានផុស

៤ years មុន

នៅ

ថ្ងៃចន្ទ ១៩ មេសា ២០២១

ដោយ

ភ្នំពេញ ៖ គិតត្រឹមម៉ោងរសៀលថ្ងៃទី១៩មេសានេះមានអាជីវករផ្សារនាគមាសឆ្លងជំងឺកូវីដ១៩កើនឡើងដល់ជិត១០០នាក់ហើយក្នុងចំណោមអាជីវករ ជិត៧០០នាក់។

យោងតាមរបាយការណ៍របស់អនុគណៈកម្មការស្រាវជ្រាវជំងឺកូវីដ១៩បានឲ្យដឹងថា គិតត្រឹមថ្ងៃទី១៩វេលាម៉ោង១៥និង១០ថ្ងៃ ឆ្នាំ២០២១នេះមាន ករណីឆ្លងនៅផ្សារនាគមាសចំនួនសរុបចំនួន ៩០ នាក់ ត្រូវបានរកឃើញ វិជ្ជមានមេរោគកូវីដ១៩។

កាលពីយប់ថ្ងៃទី១៨មេសា ក្រុមគ្រូពេទ្យស្ម័គ្រចិត្តយុវជនសម្តេចតេជោបានធ្វើតេស្តលើអាជីវករផ្សារនាគមាសដោយប្រើប្រាស់វិធីសាស្ត្រតេស្តរហ័ស លទ្ធផលរកឃើញអ្នកវិជ្ជមានចំនួន ៦០នាក់ ក្នុងចំណោមអាជីវករ ៦៨០នាក់គិតត្រឹមម៉ោង៧យប់ម្សិលមិញនេះ។

បើតាមការបញ្ជាក់គ្រូពេទ្យស្ម័គ្រចិត្តយុវជនសម្តេចតេជោ ការប្រើប្រាស់វិធីសាស្ត្រថ្មីតេស្ដរហ័សរកមេរោគកូវីដ១៩ ដែលមានឈ្មោះថា «COVID-19 Ag RAPID TEST DEVICE» ជួយបង្កើនល្បឿនការធ្វើតេស្ត អាចដឹងលទ្ធផលបានឆាប់រហ័ស។

ក្រសួងសុខាភិបាល បានសម្រេចជ្រើសឧបករណ៍តេស្ដរហ័ស ដើម្បីធ្វើតេស្ដរកមេរោគកូវីដ១៩ នៅគ្រប់ទីកន្លែងដែលសង្ស័យ។ ក្នុងនោះនៅតាមខណ្ឌនីមួយៗ នឹងមានទីតាំងមណ្ឌលសុខភាពមួយ ដើម្បីយកសំណាកធ្វើតេស្ដ និងដឹងលទ្ធផលភ្លាមៗតែម្ដង ដោយចំណាយពេលត្រឹមតែ១៥នាទី។

គួរបញ្ជាក់ថា ការប្រើប្រាស់ឧបករណ៍តេស្ដរហ័សនេះដល់អ្នកសង្ស័យកូវីដ១៩ នៅផ្សារដើមគរ ក្នុងចំណោមអ្នកសង្ស័យជាង ៩៤០នាក់ រកឃើញអ្នកវិជ្ជមានរហូតដល់ទៅ៩១នាក់ ហើយពេលយកមកផ្ទៀងផ្ទាត់ជាមួយម៉ាស៊ីនធំ គឺលទ្ធផលដូចគ្នាដូច្នេះក្រសួងសុខាភិបាល នឹងចាប់ផ្ដើមអនុវត្ដវិធីសាស្ត្រថ្មីនេះតែម្ដង ដើម្បីបង្កើនល្បឿននិងការកាត់បន្ថយការចម្លងពីម្នាក់ទៅម្នាក់៕

ដោយ ៖ សំអឿន