ព័ត៌មានជាតិ

ចុះយកសំណាកកម្មករកម្មការិនី៩៥នាក់បន្ថែមទៀត បន្ទាប់ពីមានកម្មករ២នាក់ម្ដាយកូនមានវិជ្ជមានកូវីដ-១៩

បានផុស

៤ years មុន

នៅ

ថ្ងៃអង្គារ ២០ មេសា ២០២១

ដោយ

លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងនៅល្ងាចថ្ងៃទី១៩ ខែមេសា នេះថា បន្ទាប់ពីទទួលបានព័ត៌មានពីស្ត្រីឈ្មោះ ហង់ ស៊ីម មានវិជ្ជមានកូវីដ១៩ កាលពីល្ងាចថ្ងៃទី១៧ ខែមេសា ស្ត្រីខាងលើនេះបានប្រាប់ថា មានកូនប្រុសរបស់គាត់ឈ្មោះ រៀម សារ៉ាក់ អាយុ១៨ឆ្នាំ កំពុងធ្វើការនៅរោងចក្រ ហឹរ៉ាយហ្សិន អៅដរ (ខេមបូឌា) ស្ថិតនៅភូមិផ្សារត្រាច ឃុំលង្វែក ស្រុកកំពង់ត្រឡាច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីនេះលោកអភិបាលខេត្ត និងជាប្រធានគណៈកម្មការប្រយុទ្ធប្រឆាំងជំងឺកូវីដ-១៩ ខេត្តកំពង់ឆ្នាំង បានបញ្ជូនក្រុមការងារឆ្លើយតបបន្ទាន់នៃមន្ទីរសុខាភិបាលខេត្ត ចុះទៅយកសំណាកពីកម្មករកម្មការិនីចំនួន៩៥នាក់ (ប្រុស៥នាក់) នៅរោងចក្រខាងលើ នៅព្រឹកថ្ងៃទី១៩ ខែមេសា នេះជាបន្ទាន់ដើម្បីយកទៅធ្វើតេស្តរកជំងឺកូវី១៩។

ដោយឡែកលោក ឈឹម វុទ្ធា អភិបាលស្រុកកំពង់ត្រឡាច និងជាប្រធានគណៈកម្មាធិការប្រយុទ្ធប្រឆាំងនឹងជំងឺកូវីដ-១៩ ស្រុកកំពង់ត្រឡាចបានឲ្យដឹងថា ក្រោយពីបានទទួលបានការណែនាំរបស់លោកអភិបាលខេត្ត ក្រុមការងាររបស់លោកបានចុះមកពិនិត្យមើលរោងចក្រ ហឹរ៉ាយហ្សិន អៅដរ (ខេមបូឌា) ដើម្បីស្រាវជ្រាវរកកម្មករកម្មការិនីដែលបានពាក់ព័ន្ធជាមួយនឹងយុវជនវិជ្ជមានកូវីដ-១៩ខាងលើ ឲ្យក្រុមគ្រូពេទ្យយកសំណាកធ្វើតេស្ត ។

ចំណែក កម្មករកម្មការិនីទាំងអស់ត្រូវបានតំណាងក្រុមហ៊ុនអនុញ្ញាតឲ្យពួកគាត់នៅធ្វើចត្តាឡីស័កក្នុងអគាររោងចក្រនេះតែម្ដង ដោយរៀបចំឱ្យពួកគាត់មានកន្លែងស្នាក់នៅឲ្យបានសមរម្យ មានទាំងអាហារហូបចុក ។

លោកអភិបាលស្រុក ក៏បានធ្វើការផ្ដាំផ្ញើដល់បងប្អូនកម្មករ កម្មការិនីដែលស្នាក់នៅធ្វើចត្តាឡីស័កក្នុងរោងចក្រទាំងអស់គ្នា សូមមានការតស៊ូអត់ធ្មត់រយះពេល១៤ថ្ងៃ ដោយត្រូវរក្សាគម្លាត អនុវត្តតាមការណែនាំរបស់ក្រសួងសុខាភិបាល ធ្វើអនាម័យខ្លួនប្រាណ ឧស្សាហ៍លាងដៃ នឹងសាប៊ូ ឬអាល់កុល ឲ្យបានខ្ជាប់ខ្ជួន ដើម្បីទប់ស្កាត់ឱ្យបានកុំឱ្យជំងឺកូវី១៩ រាលដាលចូលក្នុងសហគមន៍បន្តទៀត ៕

អត្ថបទ ៖ ឈៀងថារិទ្ធ