ថៃបញ្ជូនពលរដ្ឋខ្មែរ ៣នាក់មក​ស្រុកវិញ បន្ទាប់ពីឃុំខ្លួនច្រើនឆ្នាំ ករណីចូលកាប់ឈើគ្រញូងខុសច្បាប់

អាជ្ញាធរប្រទេសថៃ នៅថ្ងៃទី ២១ ខែមេសានេះ បានបញ្ជូនប្រជាពលរដ្ឋខ្មែរចំនួន ៣ នាក់តាមច្រកអន្តរជាតិជាំ ស្រុកអង្លង់វែង ខេត្តឧត្តរមានជ័យ មកប្រទេសកម្ពុជាវិញ បន្ទាប់ពីជាប់ពន្ធនាគារច្រើនឆ្នាំ។

អ្នកទាំង៣ បានធ្វើដំណើរចូលកាប់ក្រញូងក្នុងទឹកដីថៃ ហើយត្រូវតម្រួតថៃចាប់បានជាបន្តបន្ទាប់ ហើយដាក់ក្នុងពន្ធនាគារក្នុងខេត្តស៊ីសាកេត ប្រទេសថៃ។

ប្រជាពលរដ្ឋទាំង៣នាក់ទី១ មានឈ្មោះ រ៉ាវ ឡា​ ភេទប្រុស អាយុ ៤៨ឆ្នាំ រស់នៅភូមិតាប្រុស ឃុំលាងដៃ ស្រុកអង្គរធំ ខេត្តសៀមរាប បានចាប់ខ្លួននៅថ្ងៃទី ២២ ខែមេសា ឆ្នាំ ២០១៧ ពីបទឆ្លងដែនរកឈើក្រញូងខុសច្បាប់ ចូលតាមច្រកអូស្វាយ ជាប់ពន្ធនាគារនៅខេត្តស៊ីសាកេតប្រទេសថៃ។

បុរសទី២ មានឈ្មោះ ហិន ស្រុន អាយុ ៤០ឆ្នាំ រស់នៅភូមិវាលពោធិ៍ ឃុំប្លុង ស្រុកជាំក្សាន្ត ខេត្តព្រះវិហារ ត្រូវបានចាប់ខ្លួនថ្ងៃទី២០ ខែតុលា ឆ្នាំ២០១៤ ពីបទឆ្លងដែនរកឈើក្រញូងខុសច្បាប់ ចូលតាមច្រកអានសេះ ជាប់គុកនៅខេត្តអូរប៊ុនប្រទេសថៃ។

និងបុរសទី ៣ មានឈ្មោះ ប៊ុន ថា អាយុ១៦ឆ្នាំ រស់នៅភូមិអូរស្វាយ ឃុំអូស្វាយ ស្រុកត្រពាំងប្រាសាទ ខេត្តឧត្តរមានជ័យ​។ ​ទើបចាប់ខ្លួននៅថ្ងៃទី ១២ ខែមេសា ឆ្នាំ២០២១ ពីបទឆ្លងដែនរកឈើក្នុងទឹកដីថៃ ចូលតាមច្រកអូស្វាយ(ពុំមានវត្ថុតាង) វង្វេងព្រៃអាជ្ញាធរថៃឃាត់ខ្លួនហើយបានបញ្ចូនមកឱ្យភាគីកម្ពុជាវិញ។

បច្ចុប្បន្នគ្រូពេទ្យប្រចាំការនៅច្រកអន្តរជាតិជាំ ធ្វើការបាញ់អាល់កុល និងវាស់កម្តៅ ហើយបញ្ជូនទៅធ្វើចត្តាឡីស័កនៅសាលាបឋមសិក្សាអង្លង់វែង៕

អត្ថបទ៖ ចាន់ ធី