ព័ត៌មានជាតិ

កម្មការិនីម្នាក់ឆ្លងកូវីដ១៩ ជិះរថយន្ដជាមួយកម្មករជាច្រើនទៀតចុះឡើងទៅផ្ទះរាល់ថ្ងៃ

បានផុស

៤ years មុន

នៅ

ថ្ងៃពុធ ២១ មេសា ២០២១

ដោយ

កម្មការិនីម្នាក់ធ្វើការនៅរោងចក្រ7NG ឃុំវិហារសួគ៌ ស្រុកខ្សាច់កណ្ដាល ឈ្មោះ ឌឿន ចន្ធា អាយុ២៩ឆ្នាំ រស់នៅភូមិត្នោត ឃុំរកា ស្រុកពារាំង ខេត្តព្រៃវែង បានឆ្លងជំងឺកូវីដ១៩ ហើយបានជិះរថយន្ដជាមួយកម្មករកម្មការិនីជាច្រើនផ្សេងទៀត ចុះឡើងពីកន្លែងធ្វើការទៅផ្ទះរាល់ថ្ងៃ។ នេះបើយោងតាមការបញ្ជាក់ពីការិយាល័យសុខាភិបាលប្រតិបត្តិស្រុកពារាំង នៅព្រឹកទី២១ ខែមេសា ឆ្នាំ២០២១នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់បានឲ្យដឹងថា កម្មការិនីដែលវិជ្ជមានជំងឺកូវីដ១៩រូបនេះ កន្លងមកបានជិះរថយន្តដឹកកម្មករជាមួយកម្មករកម្មការិនីជាច្រើនផ្សេងទៀតជាប្រចាំ ពីផ្ទះទៅកន្លែងធ្វើការ និងពីកន្លែងធ្វើការមកផ្ទះវិញ។

កាលពីថ្ងៃទី១៩ ខែមេសា ឆ្នាំ២០២១ កម្មការិនីរូបនេះមានអាការៈក្ដៅខ្លួន ហើយក្រុមគ្រូពេទ្យបានតម្រូវឱ្យធ្វើចត្តាឡីស័ក និងពិនិត្យសំណាក។ លុះដល់ថ្ងៃទី២០ ខែមេសា ឆ្នាំ២០២១ ជាលទ្ធផលគឺវិជ្ជមានកូវីដ១៩។

មន្ត្រីការិយាល័យសុខាភិបាលប្រតិបត្តិស្រុកពារាំងបានបញ្ជាក់ថា ករណីនេះអាចមានអ្នកពាក់ព័ន្ធច្រើន ហើយមន្ត្រីជំនាញនិងក្រុមគ្រូពេទ្យកំពុងស្រាវជ្រាវរកនាក់ពាក់ព័ន្ធ ដើម្បីទប់ស្កាត់ការឆ្លងរីករាលដាលចូលសហគមន៍កាន់តែធ្ងន់ធ្ងរបន្ថែមទៀត៕

អត្ថបទ ៖ សុខុម