អ្នកជំងឺកូវីដ១៩ជិត ៣ពាន់ នាក់កំពុងរង់ចាំរកកន្លែងសម្រាកព្យាបាល

ក្រសួងសុខាភិបាលបានឱ្យដឹងថា មានអ្នកជំងឺកូវីដ១៩ ជិត៣ពាន់នាក់ (២៧២៧) កំពុងរង់ចាំបញ្ជូនទៅរកកន្លែងសម្រា​ក​ព្យាបាល ខណៈអ្នកជំងឺកំពុងសម្រាកព្យាបាលនៅមន្ទីរពេទ្យ និងកន្លែងនានាបានកើនឡើងដល់ជាង៥ពាន់នាក់ (៥៤០៤) នៅទូទាំងប្រទេស។

បើតាមក្រសួងសុខាភិបាល អ្នកជំងឺនៅតាមមន្ទីរពេទ្យធំៗ នៅរាជធានីភ្នំពេញ ដូចជាសណ្ឋាគារក្រេតឌូក មានចំនួន ២២៥ នាក់ មន្ទីរពេទ្យហ្លួងម៉ែ ១៦៥នាក់។

ក្រៅពីនេះ អ្នកជំងឺច្រើនក៏មាននៅខេត្តព្រះសីហនុ ដូចជា មន្ទីរពេទ្យបង្អែកខេត្តព្រះសីហនុ ចំនួន ១៧៣នាក់ និងសណ្ឋាគារសម័យថ្មីខេត្តព្រះសីហនុ មានអ្នកជំងឺកូវីដ១៩កំពុងសម្រាកព្យាបាលចំនួន ៣៥៩ នាក់។

ក្រសួងសុខាភិបាលនៅថ្ងៃទី ២២ ខែមេសានេះ បានប្រកាសរកឃើញករណីឆ្លងជំងឺកូវីដ១៩ ថ្មីចំនួន ៤៤៦ នាក់ ក្នុងព្រឹត្តិការណ៍សហគមន៍ ២០ កុម្ភៈ និងជាសះស្បើយចំនួន ១៣០ នាក់។

អ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ បានកើនឡើងដល់ ៧៦៤៨ នាក់ រីឯអ្នកស្លាប់ បានកើនឡើងដល់ ៥៩ នាក់៕

អត្ថបទ៖ ឡេង ដេត