ព័ត៌មានជាតិ

តុលាការសម្រេចឃុំខ្លួនជនជាតិចិន១៤នាក់ ដែលលួចឆ្លងដែនល្មើសបម្រាម

បានផុស

៤ years មុន

នៅ

ថ្ងៃព្រហស្បតិ៍ ២២ មេសា ២០២១

ដោយ

តុលាការខេត្តកំពត នៅថ្ងៃទី២២ ខែមេសា ឆ្នាំ២០២១នេះ បានចេញដីកាឃុំខ្លួនជនជាតិចិនចំនួន១៤នាក់ ដាក់ពន្ធនាគារក្រោយកម្លាំងនគរបាលបង្ក្រាបបាន ពេលកំពុងលួចឆ្លងដែនពីខេត្តកំពត មករាជធានីភ្នំពេញ ដោយបន្លំជិះនៅក្នុងរថយន្តដឹកទំនិញ។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ឲ្យដឹងថា ក្រោយតុលាការចេញដីការួច កម្លាំងរបស់លោកបាននាំខ្លួនជនជាតិចិនទាំង១៤នាក់នេះ ទៅកាន់ពន្ធនាគារខេត្តនៅថ្ងៃនេះហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា កម្លាំងនៃស្នងការដ្ឋាននគរបាលខេត្តកំពត នៅវេលាម៉ោង៩ព្រឹកថ្ងៃទី២០ ខែមេសា ឆ្នាំ២០២១ បានបង្ក្រាបជនជាតិចិន១៤នាក់ ដែលបម្រុងធ្វើដំណើរឆ្លងកាត់ខេត្តកំពត ទៅរាជធានីភ្នំពេញ ដោយបន្លំជិះក្នុងរថយន្ដដឹកជំនិញ ដើម្បីបំភាន់ភ្នែកសមត្ថកិច្ច។

លោកស្នងការបានបញ្ជាក់ទៀតថា កម្លាំងប្រចាំការនៅគោលព្រំប្រទល់ខេត្ត បានធ្វើការឃាត់រថយន្តមួយគ្រឿងនៅភូមិអង្គឃ្លៃ ឃុំត្រម៉ែង ស្រុកឈូក ដែលបានរត់ពន្ធដឹកជនជាតិចិនចំនួន១៤នាក់ ពីខេត្តព្រះសីហនុ ដោយធ្វើដំណើរតាមផ្លូវជាតិលេខ៤ ឆ្លងកាត់តាមភូមិសាស្ត្រ នៅឃុំតេជោអភិវឌ្ឍន៍ ស្រុកឈូក តាមរថយន្ត១គ្រឿងម៉ាក សាំយ៉ុង ពណ៌ទឹកប្រាក់ ពាក់ស្លាកលេខ ភ្នំពេញ 2AH-0465។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបញ្ជាក់ថា តាមការសួរនាំជំហ៊ានដំបូង ពួកគេធ្វើដំណើរមកពីខេត្តព្រះសីហនុ ហើយក្នុងគោលដៅទៅរាជធានីភ្នំពេញ ដោយប្រើប្រាស់រថយន្ដខាងលើនេះ បិទបាំងដោយកេសស្នោនៅជុំវិញ ដើម្បីបន្លំភ្នែកសមត្ថកិច្ចថាជារថយន្ដដឹកគ្រឿងសមុទ្រ៕

អត្ថបទ ៖ សេង ណារិទ្ធ

Related Topics:ខេត្តកំពត