ព័ត៌មានជាតិ

របាយការណ៍បន្ថែមលើចំនួនអ្នកពាក់ព័ន្ធផ្ទាល់ និងប្រយោល នៅស្រុករុក្ខគិរី កើនដល់ ១០៦ នាក់

បានផុស

៤ years មុន

នៅ

ថ្ងៃសុក្រ ២៣ មេសា ២០២១

ដោយ

បើគិតមកទល់នឹងល្ងាចថ្ងៃទី២២ ខែមេសា ឆ្នាំ២០២១នេះ ក្រុមឆ្លើយតបបន្ទាន់របស់មន្ទីរសុខាភិបាល បានចុះស្រាវជ្រាវបន្ត និងបានរកឃើញអ្នកពាក់ព័ន្ធដោយផ្ទាល់ និងដោយប្រយោល ជាមួយបុរសដែលជាអ្នកដឹកផ្លែម្នាស់យកទៅលក់នៅក្រុងភ្នំពេញ ដោយមានផ្ទុកកូវីដ១៩ សរុបបានកើនឡើងរហូតដល់ចំនួន១០៦នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា បុរសដែលមានជំងឺកូវីដ ១៩ មានឈ្មោះ យ៉េន គឹមយ៉ាន អាយុ២៧ឆ្នាំ រស់នៅភូមិខ្នាចអំពរ ឃុំព្រែកជីក ស្រុករុក្ខគិរី ខេត្តបាត់ដំបង មានមុខរបរដឹកផ្លែម្នាស់ចេញពីស្រុករុក្ខគិរី ទៅលក់នៅក្នុងផ្សារនាគមាស រាជធានីភ្នំពេញ។

ក្រោយពីបានពិនិត្យឃើញថា បុរសខាងលើនេះមានផ្ទុកកូវីដ១៩ រួចមក ក្រុមគ្រូពេទ្យនៃមន្ទីរសុខាភិបាលខេត្ត សហការជាមួយមន្ទីរពេទ្យបង្អែកមូលដ្ឋាន បាននាំបុរសរូបនេះ យកទៅព្យាបាលនៅក្នុងមន្ទីរពេទ្យបង្អែកខេត្ត ព្រមទាំងបាននាំយកអ្នកប៉ះពាល់ផ្ទាល់សរុបចំនួន ១០ នាក់ ( ស្រី ៥ ) យកទៅពិនិត្យសំណាកជាលទ្ធផលលើកទី១ គឺអវិជ្ជមាន ដោយឡែកអ្នកពាក់ព័ន្ធប្រយោល ដែលសរុបមានចំនួនកើនដល់៩៦នាក់ ( ស្រី ៥១ ) ក៏បានយកសំណាកទៅពិនិត្យដែរ ជាលទ្ធផលទៅលើមនុស្សចំនួន៩១នាក់ អវិជ្ជមាន និងចំនួន៥ សំណាកទៀត កំពុងរង់ចាំលទ្ធផលតេស្តពីមន្ទីរពិសោធន៍។

បច្ចុប្បន្នបន្ទាប់ពីរដ្ឋបាលខេត្ត បានសម្រេចបិទខ្ទប់ភូមិខ្នាចអំពរនេះរួចមក ក្រុមការងារនៃមន្ទីរសុខាភិបាលខេត្ត បានដាក់កម្លាំងបន្ថែម ដើម្បីបន្តការតាមដានស្រាវជ្រាវយ៉ាងម៉ត់ចត់ជាទីបំផុត ដើម្បីទប់ស្កាត់នៃការរីករាលដាលជំងឺកូវីដ១៩ នេះមិនឲ្យឆ្លងទៅកាន់ភូមិសាស្ត្រដទៃទៀត ៕

អត្ថបទ៖ សោ និយមរត្ន័

សូមចុចអាន៖ អ្នកពាក់ព័ន្ធនឹងសពឈ្មោះ នូចុល មានជំងឺកូវីដ១៩ ចំនួន៤៨នាក់ តេស្តលើកទី១អវិជ្ជមាន