អាជ្ញាធរ​បិទ​ផ្សារ​ច្បារអំពៅ និង​ផ្សារ​បន្លែ ឲ្យ​អាជីវករ ពលរដ្ឋ​ដែល​ធ្លាប់​ទៅ​ផ្សារ​ថ្ងៃទី ២២ ទៅ​យក​សំណាក បើ​មាន​អាការ ក្តៅ ក្អក ហត់

អាជ្ញាធរខណ្ឌច្បារអំពៅ បានសម្រេចបិទផ្សារច្បារអំពៅ និងផ្សារបន្លែ ស្ថិតក្នុងសង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ចាប់ពីថ្ងៃទី ២៤ ខែមេសា ដល់ថ្ងៃទី ៧ ខែឧសភា ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ១៩។

រដ្ឋបាលខណ្ឌច្បារអំពៅ លើកឡើងថា ប៉ុន្មានថ្ងៃនេះ មានអាជីវករ និងប្រជាពលរដ្ឋជាច្រើន បានឆ្លងកូវីដ១៩ ក្នុងព្រឹត្តិការសហគមន៍ ២០ កុម្ភៈ គួរឱ្យព្រួយបារម្ភ ដែលចាំបាច់ត្រូវមានវិធានការទប់ស្កាត់ជាបន្ទាន់។

រដ្ឋបាលខណ្ឌច្បារអំពៅ ក៏អំពាវនាវដល់ប្រជាពលរដ្ឋ អាជីវករ សន្តិសុខ បុគ្គលិក ធ្លាប់បានចេញចូលផ្សារទាំងពីរខាងលើ ចាប់ពីថ្ងៃទី ២២ ខែមេសា ប្រសិនបើមានអាការក្តៅខ្លួន ក្អក ពិបាកដកដង្ហើម សូមអញ្ជើញទៅធ្វើតេស្តយកសំណាករកមេរោគកូវីដ១៩៕