ព័ត៌មានជាតិ

អាជ្ញាធរខេត្ត ឃាត់ខ្លួនជនជាតិចិន៥នាក់ ដែលធ្វើដំណើរមកពីរាជធានីភ្នំពេញ

បានផុស

៤ years មុន

នៅ

ថ្ងៃសុក្រ ២៣ មេសា ២០២១

ដោយ

កំពង់ចាម ៖ ជនជាតិចិន៥នាក់ ត្រូវអាជ្ញាធរស្រុកព្រៃឈរ ខេត្តកំពង់ចាមធ្វើឃាត់ខ្លួន ធ្វើដំណើរមកពីរាជធានីភ្នំពេញ តាមរយៈរថយន្តតាក់ស៊ីក្នុងគោលបំណងមកលេងមិត្តភ័ក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរស្រុកព្រៃឈរ បានឲ្យដឹងថា នៅម៉ោង១២ថ្ងៃត្រង់ ថ្ងៃទី២៣ ខែមេសា ឆ្នាំ២០២១ នៅចំណុចមុខវិទ្យាល័យ ហ៊ុន សែន ព្រៃទទឹង ស្ថិតក្នុងភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម រូបលោកបានដឹកនាំ កម្លាំង ជំនាញផែនការងារអន្តោប្រវេសន៍ នៃអធិការដ្ឋាននគរបាលស្រុកព្រៃឈរ បានធ្វើការឃាត់ខ្លួនជនជាតិចិន ចំនួន ៥ នាក់(មិនមានលិខិតឆ្លងដែន) ដែលមានឈ្មោះដូចខាងក្រោម
1.ឈ្មោះ PANG SHENG WEN ភេទប្រុស ថ្ងៃខែឆ្នាំកំណើត14-12-1988 (ចូលមកប្រទេសកម្ពុជា ក្នុងខែ3 ឆ្នាំ2018)
2.ឈ្មោះ GONG HAN RUI ភេទប្រុស ថ្ងៃខែឆ្នាំកំណើត 28-07-1995
3.ឈ្មោះ PENG CHAO ភេទប្រុស ថ្ងៃខែឆ្នាំកំណើត8-9-1995
4.ឈ្មោះYONG SHEAG FOOG ភេទប្រុស ថ្ងៃខែឆ្នាំកំណើត 15-12-1995
5.ឈ្មោះ WANG DANG ភេទប្រុស ថ្ងៃខែឆ្នាំកំណើត 14-07-1997។

អ្នកទាំង៥នាក់ខាងលើនេះ បានធ្វើដំណើរមកពីរាជធានីភ្នំពេញ តាមរយៈរថយន្តតាក់ស៊ី (មិនស្គាល់ស្លាកលេខ និងពណ៌រថយន្ត) ដែលរថយន្តនោះមិត្តភក្កិដែលជាជនជាតិចិនដូចគ្នារស់នៅខេត្តកំពង់ចាម(មិនស្គាល់ឈ្មោះ) ជាអ្នករៀបចំឲ្យធ្វើដំណើរចេញពីភ្នំពេញវេលាម៉ោងប្រហែល១ព្រឹក ថ្ងៃ២៣ ខែមេសានេះហើយមកដល់ចុះនៅស្តុបផ្សារព្រៃទទឹង នៅវេលាម៉ោង៩ព្រឹក និងដើររកទិញចំណីហូបបន្ទាប់មកក៏ទាក់ទងមិត្តភក្ដិមិនបាន រួចពួកគេទាំង៥នាក់ខាងលើបានមកសម្រាកនៅវិទ្យាល័យហ៊ុន សែន ព្រៃទទឹងតែម្ដង។ គោលបំណង ដើម្បីមកលេងមិត្តភក្ដិដែលជាជនជាតិចិនដូចគ្នារស់នៅខេត្តកំពង់ចាម។

សូមបញ្ជាក់ផងដែរ កងកម្លាំងនគរបាលនៃស្នងការនគរបាលខេត្តកំពង់ចាមនឹងធ្វើការស្រាវជ្រាវរករថយន្តដែលបានដឹកជនជាតិទាំង៥នាក់នោះមកដល់ទីនេះ ហើយធ្វើការអនុវត្តន៍តាមនីតិវិធីច្បាប់ ខណៈអាជ្ញាធរកំពុងធ្វើការទប់ស្កាត់ការពារ ការឆ្លងរីករាលដាលជំងឺកូវីដ១៩ជាប្រចាំ។

ក្រោយពីធ្វើការឃាត់ខ្លួនសួរនាំរួចមក អាជ្ញាធរស្រុក សហការជាមួយក្រុមគ្រូពេទ្យបានធ្វើតេស្តពិនិត្យមើលវីរុសកូវីដ១៩ ដោយលទ្ធផលអវិជ្ជមាន បន្ទាប់មកទៀត ត្រូវរៀបចំបញ្ជូនជនជាតិចិនទាំង៥នាក់នេះ ទៅធ្វើចត្តាឡីស័កនៅមណ្ឌលចត្តាឡីស័កគរុកោសល្យភូមិភាគខេត្តកំពង់ចាមបន្តទៀត៕

ដោយ ៖ ហុង ម៉េងហៀ