ត្រឹម​ដំណាច់​​ខែកុម្ភៈ ដំណើរការ​សាងសង់​កំពង់​ផែទឹកជ្រៅ​ក្រុង​ព្រះសីហនុ​សម្រេចបាន ៦០,៦៦%

ត្រឹម​ដំណាច់ខែកុម្ភៈ ឆ្នាំ២០២៦ ដំណើរការ​សាងសង់កំពង់ផែទឹកជ្រៅ​ក្រុង​ព្រះសីហនុ​ជំហានទី ១ សម្រេចបានប្រមាណ​ ៦០,៦៦ % នៃផែនការគ្រោងទុក។ នេះបើ​យោង​តាម​កិច្ចប្រជុំប្រចាំខែកុម្ភៈ ឆ្នាំ ២០២៦ ស្តី​ពីការត្រួតពិនិត្យវឌ្ឍនភាព និងសុវត្ថិភាពការដ្ឋានសាងសង់នៃការអនុវត្តគម្រោងអភិវឌ្ឍន៍ចំណតផែ​កុង​​តឺន័រទឹកជ្រៅថ្មី-ជំហានទី ១។

កាលពី​ថ្ងៃទី២៦ ខែកុម្ភៈ ឆ្នាំ២០២៦ លោក ទី សាគុណ អគ្គនាយករងទទួលបន្ទុកបច្ចេកទេស​កំពង់ផែស្វយ័តក្រុងព្រះសីហនុ បាន​បើកកិច្ចប្រជុំប្រចាំខែ កុម្ភៈ ឆ្នាំ ២០២៦ ដើម្បី​ត្រួតពិនិត្យវឌ្ឍនភាពការអនុវត្តគម្រោងសាងសង់​ចំណតផែកុងតឺន័រទឹកជ្រៅថ្មី-ជំហានទី ១ ជាមួយក្រុមហ៊ុនសាងសង់ TOA Corporation និងក្រុមហ៊ុនទីប្រឹក្សាគម្រោង Nippon Koei & Oriental Consultant Global JV។

ផ្អែក​តាម​របាយការណ៍​ក្នុង​កិច្ចប្រជុំបាន​បង្ហាញ​ពីវឌ្ឍនភាពនៃ​​ដំណើរការ​សាងសង់​កំពង់ផែទឹកជ្រៅ​ជំហានទី ១ គិត​រហូតដល់ដំណាច់ខែកុម្ភៈ ឆ្នាំ២០២៦ សម្រេចបាន​ប្រមាណ ៦០,៦៦ %។

ចំណតផែកុងតឺន័រទឹកជ្រៅ​ក្រុងព្រះសីហនុ​ជំហានទី១ ដែលកំពុងដំណើរការ​​សាងសង់​មានជម្រៅទឹក ១៤,៥ ម៉ែត្រ ​តាមផែនការ គ្រោង​បញ្ចប់​​​នៅ​ឆ្នាំ ២០២៨។ 

រដ្ឋាភិបាល​កម្ពុជា​បាន​វិនិយោគទឹកប្រាក់​ប្រមាណ ៧៥០ លាន​ដុល្លារ ដើម្បី​អភិវឌ្ឍ​កំពង់ផែទឹកជ្រៅ​​ខេត្តព្រះសីហនុ​​ទាំង ៣ ដំណាក់កាល​ ដើម្បី​​ឆ្លើយតប​ទៅ​កំណើន​​ការ​ដឹក​ជញ្ជូន​ទំនិញតាមផ្លូវសមុទ្រ និងការ​ធ្វើ​ពាណិជ្ជកម្មរបស់ប្រទេស​កម្ពុជា​។

នៅ​ក្នុង​ពិធី​ជួប​សំណេះសំណាល​ជាមួយមន្ត្រីរាជការ បុគ្គលិក កម្មករ និយោជិតកំពង់ផែស្វយ័តក្រុងព្រះសីហនុ កាលពី​ថ្ងៃទី ០១ ខែឧសភា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា​បាន​បញ្ជាក់​ថា ការវិនិយោគ​អភិវឌ្ឍ​កំពង់ផែស្វយ័តក្រុងព្រះសីហនុ គឺជាយុទ្ធសាស្ត្រយកលុយបង្កើត​លុយ​។ ការអភិវឌ្ឍ​ចំណតផែ​កុងតឺន័រ​ថ្មីទាំង ៣ ដំណាក់​​កាល​ នឹងប្រែក្លាយកំពង់ផែស្វយ័តក្រុងព្រះសីហនុទៅជាកំពង់ផែ​អន្តរជាតិ​​ខ្នាតធំ (Hub Port) ដែលអនុញ្ញាត​ឱ្យនាវាកុង​តឺន័រ​ធុនធំៗមានផ្លូវដឹកជញ្ជូន​ពីគ្រប់តំបន់នៅក្នុងពិភពលោកអាចចូល​ចតបាន ដោយពុំមានឧបសគ្គលើជម្រៅទឹក​៕