យុវជនពីរនាក់ត្រូវសមត្ថកិច្ចស្រុកគីរីវង់កសាងសំណុំរឿងទៅតុលាការពីបទផ្គេីននឹងបម្រាមរាជរដ្ឋាភិបាល

យុវជន២នាក់ថ្មីទៀតនៅស្រុកគីរីវង់ ខេត្តតាកែវជួបជុំគ្នាហូបចុកគ្រឿងស្រវឹង បេីកធុងបាសបំពងសម្លេងច្រៀងរាំផ្គេីនទៅនិងបម្រាមអាជ្ញាធរ ត្រូវបានកម្លាំងអធិការដ្ឋានស្រុកចុះឃាត់ខ្លួនយកមកកសាងសំណុំរឿង។

ដោយមានការយកចិត្តទុកដាក់ពីសំណាក់ លោកឧត្តមសេនីយ៍ទោ សុខ សំណាង ស្នងការនគរបាលខេត្ត និងមានការសម្របសម្រួលពីព្រះរាជអាជ្ញាអមសាលាដំបូងខេត្តតាកែវ  យុវជន២នាក់ត្រូវបានឃាត់ខ្លួននៅថ្ងៃទី២៣ ខែមេសាឆ្នាំ២០២១វេលាម៉ោង១៥និង២០ នាទី។

លោកវរសេនីយ៍ឯក យុគ សារ៉ាត់ អធិការនគរបាលស្រុក បានដឹកនាំកម្លាំងអន្តរាគមន៍ចុះអនុវត្តលើករណីផឹកស៊ីប្រមូលផ្តុំគ្នា ចាក់ធុងបាសរាំច្រៀងបំពានលើកបម្រាមរបស់រាជរដ្ឋាភិបាលកម្ពុជា លេខ៤៤ ស.ស.រ ចុៈថ្ងៃទី ០៦ ខែមេសា ឆ្នាំ២០២១ ដែលបង្កដោយជនសង្ស័យចំនួន០២នាក់គឺ ៖  ឈ្មោះ រិន រុី ភេទប្រុស អាយុ៤១ឆ្នាំ  និងឈ្មោះ ជុំ ចន្នី ភេទប្រុស អាយុ៣៤ឆ្នាំ  ទាំង២នាក់មានទីលំនៅភូមិត្រពាំងស្រង់ ឃុំព្រះបាទជាន់ជុំ ស្រុកគិរីវង់។ បច្ចុប្បន្នជនសង្ស័យនិងវត្ថុតាងត្រូវបាននាំមកកាន់អធិការដ្ឋាននគរបាលស្រុកគីរីវង់ ដើម្បីកសាងសំណុំរឿងតាមនីតិវិធី។

សូមរំឮកដែរថា  កាលពីពេលកន្លងមកថ្មីៗនេះ  យុវជន៤នាក់នៅស្រុកសំរោង  ដែលល្មើសបម្រាមអាជ្ញាធរជួបជុំគ្នាស៊ីផឹកចាក់បាស់រាំរែកត្រូវបានសាលាដំបូងខេត្តតាកែវ ផ្តន្ទាទោសដាក់ពន្ធនាគារ រយៈពេល១ឆ្នាំ និងពិន័យជាប្រាក់ក្នុងម្នាក់ៗ ១លានរៀល ក្រោមបទមិនគោរពវិធានរដ្ឋបាល និងបទរារាំងដល់ការអនុវត្តវិធានការដែលហាមការជួប ជុំគ្នា ដើម្បីទប់ស្កាត់ការឆ្លងរាលដាលជំងឺកូវីដ១៩ នៅក្នុងសហគមន៍៕

អត្ថបទ៖ វីរៈ