​ចាប់ពីស្អែកទៅ យានយន្តធុនធំ​ត្រូវ​បង្វែរចរាចរណ៍​​កាត់​ស្ពាន​ព្រែកសំរោងក្នុងស្រុកឆ្លូង ទៅ​តាម​​ផ្លូវជាតិលេខ ៧៣ (ឆ្លូង-ប្រធាតុ) វិញ​

មន្ទីរសាធារណការ និងដឹកជញ្ជូនខេត្ត ក្រចេះ បាន​ចេញសេចក្តីជូនដំណឹង​ពី​ការ​បិទធ្វើ​ចរាចរណ៍យានយន្តធុនធំគ្រប់ប្រភេទចាប់ពីទម្ងន់ ១៥ តោន នៅលើកំណាត់ផ្លូវខេត្តលេខ ៣៧១ (ឆ្លូង-រកាខ្នុរ) ចាប់ពីថ្ងៃទី ១០ ខែមីនា ឆ្នាំ២០២៦ តទៅ ដើម្បីស្ថាបនាស្ពានព្រែកសំរោង ដោយរុះរើស្ពានដែកបេឡេត៍ រួច​សាងសង់​អំពីបេតុងសរសៃដែក។

តាមការឲ្យដឹងពីមន្ទីរសាធារណការ និងដឹកជញ្ជូនខេត្តក្រចេះ គម្រោងស្ថាបនាស្ពានព្រែកសំរោង អំពីបេតុងសរសៃដែកប្រវែង ១៨ ម៉ែត្រ ទទឹង ១០,៩ម៉ែត្រ នៅលើកំណាត់ផ្លូវខេត្តលេខ ៣៧១ ស្ថិតក្នុង​ឃុំ​ខ្សាច់អណ្តែត ស្រុកឆ្លូង នឹងចាប់ផ្តើមអនុវត្តការងាររុះរើស្ពានដែកបេឡេត៍ចាស់ ដើម្បីបើកដំណើរការអនុវត្តការដ្ឋានស្ពានបេតុង​ថ្មីនៅថ្ងៃ​ទី ១០ ខែ​មីនា ឆ្នាំ ២០២៥។

ដោយស្ថានភាពផ្លូវវាងការដ្ឋាន ត្រូវធ្វើដំណើរតាមផ្លូវលំក្រាលដីល្បាយថ្មប្រវែង ៤ គីឡូម៉ែត្រ មានទទឹងតូច និងគ្រឹះមិនរឹងមាំ សម្រាប់ទ្រទម្ងន់រថយន្តប្រភេទដឹកទំនិញធុនធំ អាចបណ្តាលឱ្យកកស្ទះចរាចរ និងធ្វើឱ្យស្រុតខូចខាតតួផ្លូវពេលរថយន្តធុនធំឆ្លងកាត់។ ដើម្បី​បញ្ចៀសការកកស្ទះចរាចរ និងធានានូវការធ្វើចរាចរណ៍សម្រាប់រថយន្តប្រភេទទេសចរណ៍ ឬរថយន្តប្រភេទលក្ខណៈគ្រួសារ ព្រមទាំងរថយន្តដឹកទំនិញធុនតូច ធ្វើដំណើរបានដោយរលូន និងសុវត្ថិភាព មន្ទីរសាធារណការ និងដឹកជញ្ជូនខេត្តក្រចេះ ណែនាំ​ឲ្យយានយន្ត​ធុនធំ ត្រូវ​បញ្ចៀសធ្វើ​ដំណើរឆ្លងកាត់តាមកំណាត់ផ្លូវជាតិលេខ ៣៧១ (ឆ្លូង-រកាខ្នុរ) ចាប់ពីថ្ងៃទី១០ ខែមីនា ឆ្នាំ២០២៦ ដោយ​បិទចរាចរណ៍ទាំងស្រុងយានយន្តធុនធំគ្រប់ប្រភេទ មាន​ទម្ងន់​ផ្ទុកសរុបចាប់ពី ១៥ តោន និងត្រូវ​បង្វែរទិសដៅចរាចរណ៍តាមផ្លូវជាតិលេខ ៧៣ (ឆ្លូង-ប្រធាតុ) សម្រាប់ការដឹកទំនិញមកកាន់ខេត្តក្រចេះ។

ចំពោះរថយន្តធុនតូច ប្រភេទទេសចរណ៍ រថយន្តលក្ខណៈគ្រួសារ រថយន្តដឹកទំនិញធុនតូចចាប់ពី ១៥ តោនចុះ និងម៉ូតូ-កង់ អាចធ្វើចរាចរណ៍បានធម្មតាតាមរយៈផ្លូវវាងប្រវែង ០៤គីឡូម៉ែត្រ ដែលក្រុមការងារបានដាក់ទិសបង្ហាញទីតាំងធ្វើដំណើរ៕

អត្ថបទ៖ ប្រុញ វិធិន