អភិបាលខេត្តសៀមរាប នៅតែបន្តដាក់ច្រកត្រួតពិនិត្យសុខភាព បិទខ្ទប់សង្កាត់ទាំង៣

ខេត្តសៀមរាប៖ អភិបាលខេត្តសៀមរាប លោក ទៀ សីហា បានជូនដំណឹងដល់មន្ត្រីរាជការសាធារណៈ កងកម្លាំងប្រដាប់អាវុធគ្រប់ប្រភេទ ប្រជាពលរដ្ឋទាំងអស់ឱ្យបានជ្រាបថា ខេត្តសៀមរាបបានអនុវត្តតាមការណែនាំរបស់រាជ រដ្ឋាភិបាល ក៏ប៉ុន្តែរដ្ឋបាលខេត្តនៅតែបន្តដាក់ច្រកត្រួតពិនិត្យសុខភាព នៅស្រុកជីក្រែង-ស្រុកស្ទោង ខេត្តកំពង់ធំ និងព្រំប្រទល់ស្រុកក្រឡាញ់-ស្រុកព្រះនេត្រព្រះ ខេត្តបន្ទាយមានជ័យ។

លោកបានបន្តទៀតថា ដោយឡែក សង្កាត់ទាំង៣ រួមមានសង្កាត់ស្វាយដង្គំ សង្កាត់សាលាកំរើក និងសង្កាត់សៀមរាប ក្នុងក្រុងសៀមរាប នៅតែបន្តបិទខ្ទប់ ការអនុវត្តវិធានការរដ្ឋបាលជាបណ្ដោះអាសន្ន ដើម្បីទប់ស្កាត់ការឆ្លងរាលដាល នៃជំងឺកូវីដ-១៩ តាមបម្រាមគោចរ។

លោកអភិបាលផ្ដាំផ្ញើប្រជាពលរដ្ឋបន្តអនុវត្ត ៣ការពារ ៣កុំ តាមការណែនាំ របស់ក្រសួងសុខាភិបាល ដើម្បីកុំឱ្យប៉ះដល់ក្រុមគ្រួសារ និងសហគន៍សោះ៕

អត្ថបទ៖ គឿនវេត