កំពុងរៀបចំធ្វើបុណ្យសព ស្រាប់តែគ្រូពេទ្យមកពិនិត្យសាកសពរកឃើញវិជ្ជមានកូវីដ១៩

អ្នករស់នៅក្នុងភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ នាំគ្នាភ័យខ្លាចសឹងរួញខ្លួន ខណះដែលគ្រូពេទ្យមកយកសំណាកសពលោកតាម្នាក់ឃើញមានវីរុសកូវីដ១៩ ស្របពេលដែលក្រុមគ្រួសារកំពុងរៀបចំធ្វើបុណ្យ។

យោងតាមសេចក្តីរាយការណ៍ពីលោក យុិន វុធ ចៅសង្កាត់ច្បារអំពៅទី២បានឲ្យកម្ពុជាថ្មីដឹងថា កាលពីវេលាម៉ោង៥និង៣០នាទីរសៀលថ្ងៃទី២៥ខែមេសានេះ លោកតាម្នាក់ឈ្មោះសុិន ម៉ៅ អាយុ៧៣ឆ្នាំ រស់នៅក្នុងភូមិដើមចាន់បានទទួលមរណះភាពនៅក្នុងផ្ទះហើយក៏រៀបចំសំណុំបែបបទដើម្បីបូជាសពទៅអាជ្ញាធរ។

លុះដល់ពេលធ្វើសំណុំបែបបទនិងរាយការណ៍ទៅផ្នែកជំនាញនៃមន្ទីរពេទ្យបង្អែកខណ្ឌច្បារអំពៅចុះទៅពិនិត្យសពឃើញថាសពមានផ្ទុកជំងឺកូវីដ១៩ហើយមិនអនុញាតិឲ្យមានការជួបជុំធ្វើបុណ្យឡើយព្រោះងាយនិងឆ្លងរាលដាលដល់អ្នកដែលមកចូលរួមធ្វើបុណ្យ។

លោកយុិន វុធ បានបន្តថាបន្ទាប់ពីគ្រូពេទ្យមកពិនិត្យសំណាកសពចេញទៅគឺសពបានដំកល់ទុកក្នុងផ្ទះរហូតដល់ម៉ោង១១ថ្ងៃត្រង់ ថ្ងៃទី២៦ខែមេសានៅមិនទាន់ឃើញរថយន្តរបស់មន្ទីរពេទ្យមកដឹកយកទៅបូជាដែលធ្វើឲ្យប្រជាពលរដ្ឋលោកមានការភ័យខ្លាចម្យ៉ាងទៀតសពត្រូវហើមពោះហើយជះក្លិនស្អុយ។

លោកយុិន វុធ បានសំណូមដល់ផ្នែកជំនាញបើសិនពិនិត្យសពទៅឃើញមានមេរោគកូវីដនេះសូមមេត្តារួសរាន់ដឹកយកទៅបូជាផង។ព្រោះគ្រាន់តែឮថាលោកតាបានទទួលមរណះភាពដោយជំងឺកូវីដ១៩មកសូម្បីតែកូនចៅបង្កើតនាំគ្នាភ័យខ្លាចឡើងរួញខ្លួនកុំថាឡើយអ្នកស្រុកអ្នកភូមិ។ហើយក៏ពុំដឹងថាលោកតាបានចម្លងទៅអ្នកភូមិណាខ្លះមុនពេលដែលលោកតាផុតដង្ហើម៕

អត្ថបទ៖ នរា