កម្មករនិយោជិតចាប់ផ្តើមទទួលបានការចាក់វ៉ាក់សាំងដូសទី២

ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ២៦ ខែមេសានេះ បានបើកមណ្ឌលចាក់វ៉ាក់សាំង ស៊ីណូវ៉ាក់ ដូសទី២ ជូនបងប្អូនកម្មករនិយោជិត ដែលកំពុងជាប់ក្នុងការបិទខ្ទប់ដើម្បីការពារការរាតត្បាតជំងីកូវីដ-១៩ ចំនួន​២ទីតាំង ក្នុងភូមិសាស្រ្តរាជធានីភ្នំពេញ។

ទីតាំងទាំង២កន្លែងរួមមាន មណ្ឌលសួនឧស្សាហកម្មកាណាឌីយ៉ា និង មណ្ឌលរោងចក្រ អាយ អេស អាយ(ISI)។

ចំពោះបងប្អូនកម្មករនិយោជិត ដែលរស់នៅក្បែរទីតាំងរោងចក្រ ឬនៅក្នុងភូមិសាស្រ្តខណ្ឌតែមួយនៃរោងចក្រដែលខ្លួនបានចាក់ដូសទី១ គឺត្រូវរង់ចាំការចាក់ ដូសទី២ នៅតាមទីតាំងដែលបានចាក់ ដូសទី១ កន្លងមក។

​
ក្នុងដំណាក់ការដែលរាជធានីភ្នំពេញ និងខេត្ត កណ្តាល ស្ថិតក្នុងការបិទខ្ទប់ និងមិនអនុញ្ញាតឱ្យឆ្លងខណ្ឌនេះ អនុគណៈកម្មការចំពោះកិច្ចចាក់វ៉ាក់សាំងការពារជំងឺកូវិដ-១៩ នៃក្រសួងការងារ និងបណ្តុះបណ្តាលវិជ្ជាជីវៈ កំពុងសម្របសម្រួលឱ្យមានមណ្ឌលចាក់វ៉ាក់សាំងស៊ីណូវ៉ាក់ ដូសទី២ ជូនបងប្អូនកម្មករនិយោជិត បន្ថែមទៀតនៅតាមបណ្ដាខណ្ឌផ្សេងៗទៀត ក្នុងភូមិសាស្ត្ររាជធានីភ្នំពេញ និងស្រុកចំនួន ២នៃខេត្តកណ្តាល ផងដែរ។

ហេតុដូច្នេះ សូមបងប្អូនកម្មករនិយោជិតដែលបានចាក់វ៉ាក់សាំងដូសទី១ នៅតាមរោងចក្រនានា សូមរង់ចាំការចាក់វ៉ាក់សាំងដូសទី២ ទៅតាមកាលបរិច្ឆេទ និងទីតាំងដែលបានកំណត់ដោយក្រសួងការងារ និងបណ្តុះបណ្តាលវិជ្ជាជីវៈ ដើម្បីអាចរក្សាគម្លាតសង្គម និងជៀសវាងការទៅប្រមូលផ្តុំនៅទីតាំងណាមួយច្រើនកុះករ ដែលអាចបង្កអោយមានការឆ្លងរីករាលដាលជំងឺកូវិដ-១៩ ជាយថាហេតុ៕