ព័ត៌មានជាតិ

អ្នកតំណាងរាស្ត្រខ្មែរ ដែលកំពុងសម្រាកព្យាបាល ចេញសារគ្រើនរំលឹក

បានផុស

៤ years មុន

នៅ

ថ្ងៃពុធ ១១ វិច្ឆិកា ២០២០

ដោយ

លោក សួស យ៉ារ៉ា អ្នកតំណាងរាស្ត្រ ខេត្តព្រះវិហារ បានចេញសារបញ្ជាក់ពីសុខភាព បន្ទាប់ពីរូបលោកស្ថិតក្រោមការតាមដានព្យាបាល ជំងឺកូវីដ-១៩។

ថ្លែងតាមបណ្ដាញសង្គម នាថ្ងៃទី១១ ខែវិច្ឆិកា ឆ្នាំ២០២០ អ្នកតំណាងរាស្ត្រ សួស យ៉ារ៉ា បានអរគុណចំពោះសារលើកទឹកចិត្តពីញាតិ មិត្ត និងថា ស្ថានភាពរបស់លោកនៅធម្មតា មិនទាន់មានការវិវឌ្ឍន៍ណាមួយដែលគួរបារម្ភឡើយ ហើយលោកបានអនុវត្តការធ្វើចត្តាឡីស័កយ៉ាងម៉ឺងម៉ាត់ទៀតផង ។

លោកក៏បានច្រានចោលផងដែរថា លោកពុំបានទៅទិវាបុណ្យឯករាជ្យ ឫទីណាផ្សេងៗឡើយ ហើយកុំយកបញ្ហា កូវីដ ធ្វើជាល្បែងនយោបាយ ឫភូតកុហក ឫប្រឌិត ដើម្បីបំភ័យសាធារណ:ជន។

អ្នកតំណាងរាស្ត្រ សួស យ៉ារ៉ា បានលើកឡើងថា សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត គឺជាមេដឹកនាំល្អ និងជាទីទុកចិត្តបំផុតក្នុងការគ្រប់គ្រងសភាពការណ៍ ក្នុងគ្រាលំបាក ហើយជាពិសេសគឺ លោកទាំងពីរ បានយកសុខទុក្ខប្រជាជនជាចម្បង។

លោកបានស្នើដល់ថ្នាក់ដឹកនាំ មន្ត្រី និងប្រជាជន រួមសាមគ្គីគ្នាអនុវត្តវិធានការ ក្រសួងសុខាភិបាល យកឈ្នះព្រឹត្តិការណ៍៣វិច្ចិកា ដោយមិនមានការឆ្លងទៅសហគមន៍ ។

សូមបញ្ជាក់ថា លោក សួស យ៉ារ៉ា ជាអ្នកតំណាងរាស្ត្រ ត្រូវបានរកឃើញថា បានឆ្លងជំងឺកូវីដ-១៩ បន្ទាប់ពីរូបលោក មានការប្រាស្រ័យទាក់ទងក្នុងព្រឹត្តិការណ៍៣វិច្ចិកា កន្លងមក៕