ខេត្តកំពង់ឆ្នាំងសម្រេចបិទខ្ទប់ភូមិចំនួនពីរបណ្តោះអាសន្នរយៈពេល១៤ថ្ងៃ

រដ្ឋបាលខេត្តកំពង់ឆ្នាំងបានសម្រេចបិទខ្ទប់ភូមិសាស្ត្រភូមិឆ្នុកទ្រូ និងភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំងរយៈពេល១៤ថ្ងៃជាបណ្តោះអាសន្ន ដោយសារភូមិទាំងពីរនេះជាតំបន់មានការឆ្លងរាលដាលជំងឺកូវីដ១៩នៅក្នុងព្រឹត្តិការណ៍សហគមន៍២០កុម្ភៈ។

លោក ឈួរ ច័ន្ទឌឿន អភិបាលខេត្តកំពង់ឆ្នាំងបានឲ្យដឹងក្នុងសេចក្តីជួនដំណឹងថា៖«ត្រូវបានបិទខ្ទប់ភូមិសាស្ត្រឆ្នុកទ្រូនិងភូមិកំពង់ព្រះឃុំឆ្នុកទ្រូស្រុកបរិបូណ៌ខេត្តកំពង់ឆ្នាំងដែលជាតំបន់មានការឆ្លងរាលដាលនៃជំងឺកូវីដ១៩ក្នុងព្រឹត្តិការណ៍សហគមន៍២០កុម្ភៈក្នុងរយៈពេលពីរសប្តាហ៍គឺចាប់ពីថ្ងៃទី២៧ខែមេសារហូតដល់ថ្ងៃទី១០ខែឧសភាឆ្នាំ២០២១ក្នុងគោលបំណងធានាដល់ប្រសិទ្ធភាពនៃការទប់ស្កាត់ការឆ្លងរាលដាលនៃជំងឺកូវីដ១៩ក្នុងភូមិសាស្ត្រដែលត្រូវបានបិទខ្ទប់និងទប់ស្កាត់ជំងឺនេះមិនឲ្យឆ្លងរាលដាលទៅតំបន់ផ្សេងទៀត»។

លោកអភិបាលខេត្តបានបន្តទៀតថា ក្នុងអំឡុងពេលនៃការអនុវត្តផែនការបិទខ្ទប់នេះបុគ្គលគ្រប់រូបត្រូវបានហាមឃាត់ការធ្វើដំណើរចេញនិងចូលក្នុងភូមិឆ្នុកទ្រូនិងភូមិកំពង់ព្រះឃុំឆ្នុកទ្រូលើកលែងតែក្នុងករណីចាំបាច់ដែលអនុញ្ញាតដោយអាជ្ញាធរប៉ុណ្ណោះ។

លោកអភិបាលខេត្តបានបញ្ជាក់ថា បុគ្គលឬនីតិបុគ្គលទាំងឡាយដែលមិនអនុវត្តតាមខ្លឹមសារខាងលើនឹងត្រូវទទួលទោសដូចមានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀតនិងលិខិតបទដ្ឋានគតិយុត្តិពាក់ព័ន្ធធរមាន៕

អត្ថបទ៖ សំអឿន