អនុញ្ញាតឱ្យផ្ទះពលរដ្ឋ១៥ គ្រួសារបើកឡើងវិញបន្ទាប់​ពីបិទ១៤ ថ្ងៃ

នៅថ្ងៃទី២៧ ខែមេសា ឆ្នាំ២០២១ ឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ បានបន្តដឹកនាំក្រុមការងារ ចុះជួបសំណេះសំណាលជាមួយប្រជាពលរដ្ឋ ដែលបានធ្វើចត្តាឡីស័កនៅតាមផ្ទះ បានគ្រប់ចំនួនតាមការកំណត់របស់ក្រសួងសុខាភិបាល ដើម្បីរួមចំណែកក្នុងការទប់ស្កាត់ការឆ្លងរីករាលដាល នៃជំងឺកូវីដ-១៩។

នៅក្នុងរយៈពេលចុងក្រោយនេះ អាជ្ញាធរខេត្តឧត្តរមានជ័យ បានចេញសេចក្តីជូនដំណឹង ស្តីពី ការបិទជាបណ្តោះអាសន្ននូវទីតាំង ដែលមានការពាក់ព័ន្ធដោយផ្ទាល់ និងដោយប្រយោល យោងតាមការវាយតម្លៃរបស់ក្រុមការងារជំនាញសុខាភិបាល លើកម្រិតហានិភ័យនៃការចម្លង។

ក្នុងនោះ មានមួយផ្នែកនៅក្នុងភូមិបុរីរដ្ឋបាល ដែលមាន ១៣គ្រួសារ បានធ្វើចត្តាឡីស័កនៅតាមផ្ទះ និងនៅភូមិគោកគរ ចំនួន ០២គ្រួសារ ហើយលទ្ធផលនៃការធ្វើតេស្តតាមដំណាល់កាលបានបង្ហាញថា អវិជ្ជមានជំងឺកូវីដ-១៩ និងថ្ងៃនេះ គម្រប់រយៈពេល ១៤ថ្ងៃ ក្រុមការងារ បានធ្វើតេស្ត (Rapid Test) ដែលអាចវាយតម្លៃ និងដឹងលទ្ធផលភ្លាមៗ បានបញ្ជាក់ថា អវិជ្ជាមានជំងឺនេះ។

តាមរយៈការចុះសំណេះសំណាលនេះ ឯកឧត្តមអភិបាលខេត្ត បានថ្លែងអំណរគុណចំពោះការចូលរួមសហការជាមួយអាជ្ញាធរមានសមត្ថកិច្ច ដោយការអត់ធ្មត់ នៅក្នងផ្ទះ ក្នុងស្មារតីទទួលខុសត្រូវខ្ពស់។ បន្ថែមលើនេះ ឯកឧត្តមអភិបាលខេត្ត បានផ្តាំផ្ញើ ដល់បងប្អូនប្រជាពលរដ្ឋទាំងអស់ សូមបន្តរក្សា និងប្រកាន់ខ្ជាប់នូវវិធានសុខាភិបាល ៣ការពារ ៣កុំ ដើម្បីសហគមន៍របស់យើងគ្នាជំងឺឆ្លងកូវីដ-១៩ (COVID-19)៕

អត្ថបទ៖ចាន់ ធី