ត្រឹម១៤ថ្ងៃ សមត្ថកិច្ចឃាត់ខ្លួនមនុស្ស ៣៤៥ នាក់ល្មើសបម្រាមបិទខ្ទប់

នៅក្នុងរយៈពេល ១៤ ថ្ងៃអាជ្ញាធរមានសមត្ថកិច្ច បានចាប់ខ្លួនមនុស្សចំនួន ៣៤៥ នាក់ ដែលបានបំពានទៅនឹងបម្រាមបិទខ្ទប់របស់រាជរដ្ឋាភិបាលកម្ពុជា។

អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ថា ក្នុងចំណោមជនល្មើសទាំង ៣៤៥ នាក់ មាន១០នាក់ បានបបញ្ជូនទៅតុលាការក្រុងភ្នំពេញ និងឃុំខ្លួនចំនួន ១០ នាក់។

ចំនួន ៣៤ នាក់បានធ្វើការអប់រំ ហើយអនុញ្ញាតឱ្យត្រឡប់ទៅផ្ទះវិញចំនួន ២៧ នាក់បញ្ជូនទៅធ្វើចត្តាឡីស័ក ១៤ ថ្ងៃ និងធ្វើការពិន័យជាទឹកប្រាក់អន្តរការចំនួន ២៧២ នាក់។

រាជរដ្ឋាភិបាលបានដាក់ចេញវិធានការបិទខ្ទប់១រយៈពេល១៤ថ្ងៃចាប់ពីម៉ោងសូន្យថ្ងៃទី១៥ខែមេសារហូតដល់ថ្ងៃទី២៨ខែមេសាឆ្នាំ២០២១និងបន្តរយៈពេល៧ថ្ងៃទៀតចាប់ពីថ្ងៃទី២៩ខែមេសារហូតដល់ថ្ងៃទី០៥ខែឧសភាឆ្នាំ២០២១។

គួរបញ្ជាក់ថា អ្នកដែលមិនគោរព និងបំពានវិធានការរដ្ឋបាលនានាដែលដាក់ចេញដោយអាជ្ញាធររាជធានីភ្នំពេញនឹងត្រូវរងការផាកពិន័យជាទឹកប្រាក់ពី១លានរៀលទៅ៥លានរៀល ហើយត្រូវផ្តន្ទាទោសដាក់ពន្ធនាគារពីចន្លោះពី៦ខែទៅ៣ឆ្នាំ និងពិន័យបន្ថែមទៀតពី២លានរៀលទៅ១០លានរៀល បើសកម្មភាពបំពាននាំឱ្យមានការចម្លងជំងឺកូវីដ​១៩ទៅអ្នកដទៃ។

បន្ថែមលើនេះ គឺនឹងត្រូវផ្ទន្ទាទោសដាក់ពន្ធនា​គារពី២ឆ្នាំទៅ៥ឆ្នាំ និងពិន័យជាទឹកប្រាក់ពី៥លានរៀលទៅ២០​លានរៀល បើសកម្មភាពបំពានបណ្តាលឱ្យប៉ះពាល់ធ្ងន់ធ្ងរដល់សុខភាពសាធារណៈ៕

អត្ថបទ៖សំអឿន