អាជ្ញាធរស្រុកបាទី គ្រោងបំពាក់កាមេរ៉ាសុវត្ថិភាពបន្ថែម និងដំឡើងអំពូលបំភ្លឺតាមដងផ្លូវជាតិលេខ៣

តាកែវ៖ លោក សាយ វណ្ណៈ អភិបាល នៃគណៈអភិបាលស្រុកបាទី បានថ្លែងក្នុងកិច្ចប្រជុំក្រុមប្រឹក្សាស្រុកថា អាជ្ញាធរ​មានគម្រោងរៀបចំបំពាក់កាមេរ៉ាសុវត្ថិភាពបន្ថែម និងដំឡើងអំពូលសឡាបំភ្លឺតាមបណ្តោយដងផ្លូវសំខាន់ៗ ចាប់ពីចំណុចផ្សារសំរោងយ៉ោង លើផ្លូវជាតិលេខ២ ឆ្ពោះទៅកាន់ផ្សារត្រាំខ្នារ លើផ្លូវជាតិលេខ៣។

លោកអភិបាលបានបញ្ជាក់ថា ការអនុវត្តគម្រោងនេះមានគោលបំណងពង្រឹងសុវត្ថិភាពសង្គម និងសណ្តាប់ធ្នាប់សាធារណៈ ជូនប្រជាពលរដ្ឋក្នុងមូលដ្ឋាន ព្រមទាំងភ្ញៀវទេសចរជាតិ និងអន្តរជាតិ ដែលធ្វើដំណើរមកកម្សាន្តនៅតំបន់ទេសចរទន្លេបាទី សួនសត្វភ្នំតាម៉ៅ និងតំបន់ជិតខាង។

ជាមួយគ្នានេះ លោកក៏បានលើកឡើងថា ការបំពាក់កាមេរ៉ា និងប្រព័ន្ធបំភ្លឺតាមដងផ្លូវ នឹងជួយបង្កើនការត្រួតពិនិត្យ សម្រួលចរាចរណ៍ កាត់បន្ថយហានិភ័យគ្រោះថ្នាក់ និងបទល្មើសផ្សេងៗ ព្រមទាំងធានាឱ្យការធ្វើដំណើររបស់ប្រជាពលរដ្ឋ និងភ្ញៀវទេសចរបានប្រកបដោយសុវត្ថិភាព និងមានភាពងាយស្រួល។

គម្រោងនេះត្រូវបានរំពឹងថា នឹងចូលរួមលើកកម្ពស់ភាពទាក់ទាញផ្នែកទេសចរណ៍ក្នុងតំបន់ និងបង្កើនទំនុកចិត្តដល់ភ្ញៀវដែលមកទស្សនាកម្សាន្តឱ្យកាន់តែច្រើន៕