ព័ត៌មានជាតិ

ប្រើថ្នាំញៀនលើសកម្រិតចាក់ប្រេងដុតខ្លួនឯង និងផ្ទះឪពុកឆេះខ្ទេច

បានផុស

៤ years មុន

នៅ

ថ្ងៃអង្គារ ៤ ឧសភា ២០២១

ដោយ

ដោយសារតែការប្រើប្រាស់គ្រឿងញៀនច្រើនពេក យុវជនម្នាក់បានយកប្រេងម៉ាស៊ូតមកស្រោចដុតខ្លួនឯងបណ្តាលឲ្យស្លាប់ក្នុងភ្នក់ភ្លើង និងបណ្ដាលឲ្យរាលដាលឆាបឆេះផ្ទះអស់១ខ្នងរួមនឹងទ្រព្យសម្បត្តិមួយចំនួនទៀត។

សមត្ថកិច្ចមូលដ្ឋានបានបញ្ជាក់ឲ្យដឹងថា គ្រោះអគ្គិភ័យនេះបានកើតឡើងនៅវេលាម៉ោងប្រមាណជាង៧និង០០នាទីយប់ ថ្ងៃទី០៣ ខែឧសភា ឆ្នាំ២០២១នៅត្រង់ចំណុចក្រុមទី២០ ភូមិកៀនកែស២ ឃុំគោកឃ្មុំ ស្រុកថ្មគោល ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់ផ្ទះមានឈ្មោះ ទុយ សាឡៅ ភេទប្រុសអាយុ៤៣ឆ្នាំ រស់នៅក្នុងភូមិឃុំកន្លែងកើតហេតុខាងលើ ជាឪពុកបង្កើតរបស់ជនរងគ្រោះដែលដុតសម្លាប់ខ្លួន។ ចំណែកឯជនរងគ្រោះដែលស្លាប់មានឈ្មោះ រើន ឡី ភេទប្រុសអាយុ២៤ឆ្នាំ រស់នៅក្នុងបន្ទុកជាមួយឳពុក។

ប្រភពខាងលើបន្តថា ផ្ទះដែលរងការបំផ្លាញដោយអគ្គិភ័យធ្វើអំពីឈើប្រក់ស័ង្កសីជញ្ជាំងក្តារទំហំ៥មx៦ម ខូចខាតអស់ប្រមាណ៨០%ដោយឡែកទំហំការប៉ះពាល់ទាំងទ្រព្យសម្បត្តិនិងសម្ភារ:នានាអស់ប្រមាណជា៣០,០០០,០០០រៀល។

ករណីខាងលើនេះ សមត្ថកិច្ចបានចេញរថយន្តពន្លត់អគ្គិភ័យជាច្រើនគ្រឿងក្នុងការសង្គ្រោះប៉ុន្តែបាន ត្រឹមតែទប់ស្កាត់កុំឲ្យអណ្តាតភ្លើងរាលទៅដល់ផ្ទះអ្នកជិតខាងប៉ុណ្ណោះ៕

អត្ថបទ ៖ សៅ សារិទ្ធ