ផ្លូវបេតុងថ្មីជាង ១គីឡូម៉ែត្រ ក្នុងសង្កាត់រមនា ដាក់ឱ្យប្រើប្រាស់ជាផ្លូវការ សម្រួលការធ្វើដំណើរ និងដឹកជញ្ជូនកសិផល

ផ្លូវបេតុងថ្មីមួយខ្សែប្រវែងជាង ១,០៥០ម៉ែត្រ ទទឹង ៨ម៉ែត្រ ស្ថិតក្នុងសង្កាត់រមនា ក្រុងសែនមនោរម្យ ខេត្តមណ្ឌលគិរី ត្រូវបានស្ថាបនារួចរាល់ និងដាក់ឱ្យប្រើប្រាស់ជាផ្លូវការហើយ។ សមិទ្ធផលថ្មីនេះ គឺជាការរួមចំណែកពង្រឹងហេដ្ឋារចនាសម្ព័ន្ធមូលដ្ឋាន សម្រួលការធ្វើដំណើរ និងលើកកម្ពស់គុណភាពជីវភាពរបស់ប្រជាពលរដ្ឋ។

ចៅសង្កាត់រមនា លោក ភី ងូក បានប្រាប់ «កម្ពុជាថ្មី» នៅថ្ងៃទី២៥ ខែមិថុនា ថា ផ្លូវបេតុងថ្មីនេះ បានតភ្ជាប់ជាមួយផ្លូវបេតុងដែលមានស្រាប់ ហើយត្រូវបានសាងសង់ដោយថវិការបស់រដ្ឋបាលខេត្ត ដែលចាប់ផ្តើមអនុវត្តតាំងពីដើមខែមិថុនា ឆ្នាំ២០២៦។ លោកបញ្ជាក់ថា ការស្ថាបនាផ្លូវនេះ បានជួយសម្រួលដល់ការធ្វើដំណើររបស់ប្រជាពលរដ្ឋ ការដឹកជញ្ជូនកសិផល និងការប្រកបអាជីវកម្មប្រចាំថ្ងៃ ឱ្យកាន់តែងាយស្រួល និងមានសុវត្ថិភាពជាងមុន។

លោកចៅសង្កាត់បន្ថែមថា ផ្លូវបេតុងថ្មីនេះ គឺជាផ្នែកមួយនៃការបន្តអភិវឌ្ឍហេដ្ឋារចនាសម្ព័ន្ធក្រោមការយកចិត្តទុកដាក់របស់រាជរដ្ឋាភិបាល និងរដ្ឋបាលខេត្ត ក្នុងគោលបំណងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងគាំទ្រដល់ការរីកចម្រើនរបស់ក្រុងសែនមនោរម្យ ដែលកំពុងអភិវឌ្ឍខ្លួនទៅជាទីក្រុងទេសចរណ៍បៃតងដ៏មានសក្តានុពល។

ជាមួយគ្នានេះ លោក តោន ប៊ុនស្រ៊ីន អាយុ ៣៥ឆ្នាំ ជាប្រជាពលរដ្ឋរស់នៅក្នុងមូលដ្ឋាន បានសម្តែងការសប្បាយរីករាយ និងអរគុណអាជ្ញាធរដែលបានយកចិត្តទុកដាក់ជំរុញឱ្យគម្រោងផ្លូវនេះក្លាយជាការពិត។ លោកបានរំលឹកថា កន្លងមក ផ្លូវនេះមានសភាពលំបាកធ្វើដំណើរ ជាពិសេសនៅរដូវវស្សា ដែលបង្កការលំបាកដល់ប្រជាពលរដ្ឋ និងសិស្សានុសិស្សក្នុងការធ្វើដំណើរទៅកាន់ទីរួមខេត្ត និងសាលារៀន។

លោកបន្ថែមថា បន្ទាប់ពីផ្លូវបេតុងថ្មីត្រូវបានដាក់ឱ្យប្រើប្រាស់ ការធ្វើដំណើរមានភាពងាយស្រួល និងសុវត្ថិភាពជាងមុន។ លើសពីនេះ ផ្លូវថ្មីក៏បានរួមចំណែកលើកសម្រស់ក្រុងសែនមនោរម្យ ធ្វើឱ្យទីក្រុងកាន់តែមានសោភ័ណភាព ទាក់ទាញភ្ញៀវទេសចរ និងជួយជំរុញសេដ្ឋកិច្ចមូលដ្ឋាន ព្រមទាំងលើកកម្ពស់ជីវភាពរបស់ប្រជាពលរដ្ឋឱ្យកាន់តែប្រសើរឡើង៕

អត្ថបទ៖ រៀ​ម សុខហេង