ព័ត៌មានជាតិ

ដកបញ្ឈរជើងអភិបាលស្រុកសាមគ្គីមានជ័យ បន្ទាប់ពីបាញ់គោពលរដ្ឋងាប់១ក្បាល

បានផុស

៤ years មុន

នៅ

ថ្ងៃពុធ ៥ ឧសភា ២០២១

ដោយ

យោងតាមសេចក្តីបញ្ជាក់ព័ត៌មានរបស់រដ្ឋបាលខេត្តកំពង់ឆ្នាំង ចុះថ្ងៃទី០៥ ខែឧសភា ឆ្នាំ២០២១នេះ លោក វន ស៊ីផា អភិបាលស្រុកសាមគ្គីមានជ័យ ត្រូវបានដកបញ្ឈរជើងនៅថ្ងៃទី០៤ ខែឧសភា ឆ្នាំ២០២១ បន្ទាប់ពីគណៈបញ្ជាការឯកភាពខេត្តបានបើកកិច្ចប្រជុំមួយកាលពីរសៀលថ្ងៃទី៣ ខែឧសភា ។

ករណីនេះដោយសារតែលោក វន ស៊ីផា បានយកកាំភ្លើងបាញ់គោប្រជាពលរដ្ឋងាប់១ក្បាល ពេលគោចូលស៊ីស្មៅនៅក្នុងបរិវេណសាលាស្រុក កាលពីល្ងាចថ្ងៃទី៣០ ខែមេសា និងបានភូតភរសមត្ថកិច្ចក្រោយពេលកើតហេតុភ្លាមៗ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីបញ្ជាក់ព័ត៌មានខាងលើនេះ រដ្ឋបាលខេត្តក៏តម្រូវឱ្យលោក វន ស៊ីផា ធ្វើស្វ័យរបាយ ការណ៍ឱ្យបានច្បាស់ទាក់ទងនឹងហេតុការណ៍ដែលខ្លួនបានប្រព្រឹត្តដើម្បីរធ្វើកំណត់ហេតុរាយការណ៍សុំយោបល់ទៅក្រសួងមហាផ្ទៃ ។

ជាមួយគ្នានោះ រដ្ឋបាលខេត្តក៏បានធ្វើការអប់រំណែនាំនិងដាក់ពិន័យរដ្ឋបាលតាមចំណុច៤០ និង៤១ នៃសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជាផងដែរ។

មន្ត្រីសាលាខេត្តម្នាក់បានឲ្យដឹងថានៅក្នុងរបាយការណ៍ផ្ទាល់របស់លោក វន ស៊ីផា ចុះថ្ងៃទី០១ ខែឧសភា បានសរសេររាយការណ៍ជូនមកលោកអភិបាលខេត្ត ក្នុងចេតនាលាក់បាំងនៅអំពើខុសឆ្គងរបស់ខ្លួន មិនព្រមសារភាពនៅកុំហុស។ ដូចជាមិនបានប្រាប់ថា បាញ់សាកកំភ្លើងម៉ាកអ្វី !! បាញ់ប៉ុន្មានគ្រាប់ !! បើដឹងថាមានហ្វូងគោនៅពីខាងមុខខ្លួនហើយ !! ហេតុអ្វីនៅតែបាញ់សាកកាំភ្លើងបុកដីទៀត ។ ដោយឡែកក្រោយពេលកើតហេតុភ្លាមៗ លោកបានភូតភរសមត្ថកិច្ចថា ខ្លួនបានប្រើដុំថ្មគប់គោបណ្ដាលឲ្យគោមួយក្បាលងាប់ ។ ប៉ុន្តែនៅពេលសមត្ថកិច្ចស្នងការនគរបាលខេត្តចុះស្រាវជ្រាវសួរនាំ ទើបលោកបានរាយការណ៍ថា លោកបានបាញ់សាកកាំភ្លើងខ្លីបណ្តាលឲ្យគ្រាប់កាំភ្លើងផ្លាតត្រូវគោមួយក្បាលទៅវិញ ។

ដោយឡែកប្រភពព័ត៌មានពីប្រជាពលរដ្ឋរស់នៅសាលាស្រុកឲ្យដឹងថា ក្នុងថ្ងៃកើតហេតុ ពួកគាត់បានឮស្នូរផ្ទុះកាំភ្លើងពីរគ្រាប់ បន្ទាប់មកក៏បានឃើញសត្វគោមួយផងផ្អើលរត់ចេញពីស្រុក ហើយទើបដឹងថា លោក វន ស៊ីផា បាញ់គោ១ក្បាលងាប់នៅក្នុងសាលាស្រុក ។

ប្រភពមួយទៀតពីមន្ត្រីសាលាស្រុកបានឲ្យដឹងថា លោក វន ស៊ីផា មានកាំភ្លើងពីរដើមប្រើប្រាស់មួយដើមជាកាំភ្លើងអាកាស្វាយបត់ មានទុស្សសៀដាក់គ្រាប់ និងគ្រាប់៤បង់ និងមួយដើមទៀតគឺកាំភ្លើងខ្លី ។

ជុំវិញរឿងមិនប្រក្រតីខាងលើនេះ ប្រជាពលរដ្ឋនិងមន្ត្រីរាជការពិតជាហួសចិត្ត ដោយរង់ចាំមើលថាតើក្រសួងមហាផ្ទៃមានចំណាត់ការបែបណាលើមន្ត្រីភូតភរ មិនព្រមភ្ញាក់ខ្លួនខាងលើ ៕

អត្ថបទ ៖ ឈៀងថារិទ្ធ