ព័ត៌មានជាតិ

មន្ត្រីជំរុញការអនុវត្តយុទ្ធនាការលើកកម្ពស់សិទ្ធិជនមានពិការភាព

បានផុស

៤ years មុន

នៅ

ថ្ងៃព្រហស្បតិ៍ ១២ វិច្ឆិកា ២០២០

ដោយ

ក្រុមប្រឹក្សាសកម្មភាពជនពិការ សហការជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងមហាផ្ទៃ បានធ្វើយុទ្ធនាការផ្សព្វផ្សាយ ផែនការយុទ្ធសាស្ត្រជាតិ ស្ដីពីពិការភាព ២០១៩-២០២៣ និងផ្សព្វផ្សាយ លិខិតបទដ្ឋានបច្ចេកទេស ហេដ្ឋារចនាសម្ព័ន្ធរូបវន្ត បង្កលក្ខណៈងាយស្រួលសម្រាប់ជនមានពិការភាព ដល់សមាជិកក្រុមប្រឹក្សាសកម្មភាពជនពិការ ខេត្តសៀមរាប។

ថ្លែងក្នុងពិធី នៅថ្ងៃទី១២ ខែវិច្ឆិកា ឆ្នាំ២០២០ លោក នាក់ ណេរ៉ុន អភិបាលរងខេត្តសៀមរាប បានរាយការណ៍អំពីការយកចិត្តទុកដាក់ខ្ពស់របស់អាជ្ញាធរ លើវិស័យពិការភាព នៅទូទាំងខេត្ត ព្រោះថា ការងារពិការភាព គឺជាកិច្ចការងារពហុវិស័យ ដែលទាមទារឲ្យយកចិត្តទុកដាក់ ដើម្បីការពារ និងលើកកម្ពស់សិទ្ធិជនពិការ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា សាលាខេត្ត បានយកចិត្តទុកដាក់ផ្ដល់ដល់ជនពិការ នូវសេវាសុខភាពប្រកបដោយគុណភាព និងសមភាព ព្រមទាំងការស្ដារលទ្ធភាពពលកម្មកាយសម្បទា និងសតិបញ្ញា ហើយបង្កើនកិច្ចអន្តរាគមន៍ សេវាយុត្តិធម៌ ដើម្បីកាត់បន្ថយ និងឈានទៅរកការលុបបំបាត់ការរើសអើង ការរំលោភបំពាន ការប្រមាថ និងការកេងប្រវ័ញ្ចលើជនពិការ ។

លោក ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការ បានថ្លែងថា រាជរដ្ឋាភិបាលកម្ពុជា មានចក្ខុវិស័យច្បាស់លាស់ ធ្វើយ៉ាងណាឱ្យជនមានពិការភាព និងក្រុមគ្រួសារ មានគុណភាពជីវិតល្អ និងចូលរួមយ៉ាងសកម្មពេញលេញ ស្មើភាពគ្នាក្នុងសង្គម ដែលមានការគោរពសិទ្ធិ និងសេចក្ដីថ្លៃថ្នូរ ព្រមទាំងមានការធ្វើបរិយាបន្នពិការភាពក្នុងគ្រប់វិស័យនិងការអភិវឌ្ឍ។

លោក យុន ឈុន្នី រដ្ឋលេខាធិការក្រសួងមហាផ្ទៃ បានថ្លែងថា រាជរដ្ឋាភិបាលកម្ពុជា បានដាក់ចេញនូវផែនការយុទ្ធសាស្ត្រជាតិ ស្ដីពី ពិការភាពឆ្នាំ២០១៩-២០២៣ ក្នុងទិសដៅឈានទៅលុបបំបាត់រាល់ ទម្រង់កេងប្រវ័ញ និងរើសអើងលើជនមានពិការភាព ដោយធ្វើយ៉ាងណាឱ្យជនមានពិការភាពកាន់តែទទួលបានការគាំទ្រពីសង្គម បង្កើនគុណភាពជីវិតឱ្យកាន់តែប្រសើរឡើង ទទួលបានការយកចិត្តទុកដាក់ស្របតាមគោលដៅអភិវឌ្ឍន៍ប្រកបដោយចីរភាព (SDGs) «មិនមាននរណាម្នាក់ ត្រូវបានបំភ្លេច » ៕

អទ្ថបទ ៖ គឿនវេត