កុមារាអាយុ៦ ឆ្នាំលង់ទឹកស្លាប់ក្នុងអាងទឹក ពេលម្តាយកំពុងលង់លក់

កុមារាអាយុ ៦ ឆ្នាំបានលង់ទឹកស្លាប់ក្នុងអាងទឹក ពេលម្តាយកំពង់ដេកលក់។ ហេតុការណ៍​ភ្ញាក់ផ្អើល បានកើតឡើង កាលពីវេលាម៉ោង ២៖៤០ នាទី រសៀលថ្ងៃទី ០៩ ខែឧសភា ឆ្នាំ ២០២១ ស្ថិតនៅ​ភូមិ​ប្រឡាយជ្រៃ ឃុំគោកបល្ល័ង្គ ស្រុកមង្គលបូរី ខេត្តបន្ទាយមានជ័យ។ កុមារារងគ្រោះឈ្មោះ វ៉ារី សារ៉ា អាយុ ០៦ ឆ្នាំ រស់នៅកន្លែងកើតហេតុ។

នគរបាលស្រុកមង្គលបូរី បានប្រាប់ឲ្យដឹង ក្រោយពេលម្តាយទទួលទានបាយថ្ងៃត្រង់រួច ម្តាយ​ក្មេងប្រុសនោះបានដេកលង់លក់មួយស្របក់ ខណៈនោះកូនប្រុសរបស់​គាត់បានទៅងូត​ទឹកក្នុង​អាង បណ្តាលឲ្យស្លាប់ ក្រោកពីដេកបាត់កូនដើររកខាងក្រៅផ្ទះមិនឃើញ ទៅមើល​ក្នុងបន្ទប់​ទឹកក្នុងផ្ទះឃើញសពកូនប្រុសអណ្តែតនៅក្នុងអាងទឹកក្នុងផ្ទះមិនដឹងជាស្លាប់តាំងពីពេលណានោះទេ។

នគរបាលសន្និដ្ឋានថា សង្ស័យក្មេងលេងសាប៊ូធ្លាក់ចូលក្នុងអាងឬក៏ឈោងយកផ្តិលបណ្តាលច្រឡោតចូលក្នុងអាងហើយក៏លង់ស្លាប់តែម្តង៕
អត្ថបទ៖ វ៉ាន់ ណាង