ព័ត៌មានជាតិ

ប្រជាពលរដ្ឋ ៥,០០០គ្រួសាររស់នៅក្នុងខណ្ឌមានជ័យទទួលអំណោយសម្ដេចតេជោដល់មុខផ្ទះ

បានផុស

៤ years មុន

នៅ

ថ្ងៃអង្គារ ១១ ឧសភា ២០២១

ដោយ

កាលពីថ្ងៃទី១០ ខែឧសភា ឆ្នាំ២០២១ អាជ្ញាធរខណ្ឌមានជ័យ បានបន្តនាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនប្រជាពលរដ្ឋ និងកម្មករ កម្មការនី ចំនួន៥,០០០ គ្រួសារ ដល់ច្រកទ្វារមុខផ្ទះ និងបន្ទប់ជួល ដែលកំពុងធ្វើចត្តាឡីស័កនៅតាមផ្ទះ ក្នុងតំបន់ក្រហម។ ក្នុងនោះប្រជាពលរដ្ឋក្នុងសង្កាត់ស្ទឹងមានជ័យ៣ គឺភូមិដំណាក់ធំ២ មានចំនួន ២,០០០ គ្រួសារ ភូមិដំណាក់ធំ៣ ចំនួន ២,០០០ គ្រួសារ ភូមិទ្រា៤ ចំនួន ១,០០០ គ្រួសារ ។

អាជ្ញាធរខណ្ឌមានជ័យ បានលើកឡើងថា៖ អំណោយដ៏ថ្លៃថ្លាទាំងអស់នេះ ជាអំណោយរបស់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដោយក្នុងមួយគ្រួសារទទួលបានអង្ករ២៥ គីឡូ, មី១កេស , ទឹកត្រី ១យួរ, ទឹកស៊ីអ៊ីវ ១យួរ និងត្រីខ ១យួរ ។ សម្ដេចទាំងទ្វេ តែងតែយកចិត្តទុកដាក់ណាស់ ចំពោះបងប្អូនប្រជាពលរដ្ឋកម្ពុជាទាំងមូល ជាពិសេសប្រជាពលរដ្ឋ ដែលកំពុងសម្រាកធ្វើចត្តាឡីស័កតាមផ្ទះ តាមបន្ទប់ ក៏ដូចជាតាមមណ្ឌលផ្សេងៗ ដូច្នេះសូមបងប្អូនប្រជាពលរដ្ឋទាំងអស់ កុំមានការព្រួយបារម្ភ សម្តេចតេជោ ដាច់ខាត មិនទុកឲ្យបងប្អូនប្រជាពលរដ្ឋណាម្នាក់ ស្លាប់ដោយការអត់អាហារនោះទេ៕

Related Topics: