ព័ត៌មានជាតិ

ខេត្តឧត្តរមានជ័យ រកឃើញពលករខ្មែរម្នាក់ មកពីប្រទេសថៃ វិជ្ជមានកូវីដ១៩

បានផុស

៣ years មុន

នៅ

ថ្ងៃអង្គារ ១១ ឧសភា ២០២១

ដោយ

ឧត្តរមាជ័យ ៖ ពលករខ្មែរ មកពីថៃម្នាក់ទៀតហើយ ត្រូវបានរកឃើញថា មានវិជ្ជមានកូវីដ១៩។ នេះបើតាម សេចក្តីប្រកាសព័ត៌មាន របស់រដ្ឋបាលខេត្តឧត្តរមានជ័យ ដែលចេញនៅថ្ងៃទី១១ ខែឧសភា ឆ្នាំ២០២១នេះ។

អ្នកដែលមានវិជ្ជមានកូវីដ១៩នេះ ឈ្មោះ ភាព សោភ័ណ ភេទស្រី អាយុ៣៥ឆ្នាំ មានទីលំនៅភូមិថ្នលកែង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។

បន្ទាប់ពីលទ្ធផលសំណាកបញ្ជាក់ថា ស្ត្រីពលករខាងលើ មានវិជ្ជមានកូវីដ១៩ ក្រុមគ្រូពេទ្យបានបញ្ជូនគាត់ទៅសម្រាកព្យាបាលនៅមន្ទីរពេទ្យបង្អែកខេត្ត។ ចំណែកអ្នកពាក់ព័ន្ធត្រូវបានបញ្ជូនទៅធ្វើចត្តាឡីស័កនៅមណ្ឌលចត្តាឡីស័កផ្ទះសំណាក់ឧត្តមរដ្ឋា ដើម្បីតាមដានសុខភាព និងយកសំណាកដើម្បីពិនិត្យ រកមេរោគកូវីដ-១៩។

រដ្ឋបាលខេត្តសូមថ្លែងអំណរគុណចំពោះបុគ្គលិកសុខាភិបាល កងកម្លាំង និងអ្នកពាក់ព័ន្ធ ព្រមទាំងបងប្អូនប្រជាពលរដ្ឋទាំងអស់ដែលបានសហការ ការពារ ទប់ស្កាត់ការរីករាលដាលជំងឺកូវីដ១៩ក្នុងសហគមន៍ខេត្តឧត្ដរមានជ័យ។ ឆ្លៀតឧកាសនេះដែរ អាជ្ញាធរក៏សូមអំពាវនាវដល់បងប្អូនប្រជាពលរដ្ឋទាំងអស់ឲ្យបន្តអនុវត្តតាមការណែនាំរបស់រាជរដ្ឋាភិបាល វិធានការរបស់ក្រសួងសុខាភិបាល និងសេចក្ដីណែនាំរបស់ខេត្តឲ្យបានម៉ឺងម៉ាត់ និងត្រូវប្រកាន់ខ្ជាប់នូវ ការរក្សាគម្លាត រក្សាអនាម័យ លាងដៃដោយអាកុល ឬជែល ជាប្រចាំ៕

ដោយ ៖ ចាន់ ធី

Related Topics:កូវីដ-១៩