ពលករ​មក​ពី​ថៃ ដេញ​ប្រពន្ធកូន​ចេញក្រៅ​បន្ទប់​ចត្តាឡីស័ក រួច​ចង​ក​សម្លាប់​ខ្លួន​​ចោល​គ្រួសារ​

ខេត្តបាត់ដំបង៖ បុរសម្នាក់បានព្យាយាមសម្លាប់ខ្លួនជាច្រើនលើកច្រើនសារមិនសម្រេច តាំងពីនៅប្រទេសថៃ ទីបំផុតបានស្លាប់នៅក្នុងមណ្ឌល ចត្តាឡីស័ក ដោយសារចង.កសម្លាប់ខ្លួន។

នៅថ្ងៃទី១៥ខែ ឧសភា ឆ្នាំ ២០២១ នៅវេលាម៉ោង ១ និង ១០នាទី មានការភ្ញាក់ផ្អើលដោយសារតែមានករណីមនុស្សចង.កស្លាប់នៅក្នុងមណ្ឌលធ្វើចត្តាឡីស័ក ក្នុងស្រុកឯកភ្នំ។

តាមការបំភ្លឺពីឈ្មោះ អេម ដួង ភេទស្រី  អាយុ ៣១ឆ្នាំ មុខរបរកម្មករមកពីប្រទេសថៃ រស់នៅភូមិសួសអី ឃុំពាមឯក ស្រុកឯកភ្នំ បានមកធ្វើចត្តាឡីស័កកំរិត០១ នៃអនុវិទ្យាល័យព្រែកនរិន្ទ ឃុំព្រែកនរិន្ទ ស្រុកឯកភ្នំ ខេត្តបាត់ដំបង ដែលត្រូវជាប្រពន្ធជនរងគ្រោះ(សព) បានបំភ្លឺឲ្យ​ដឹងថា កាលពីថ្ងៃទី១៥ ខែឧសភា ឆ្នាំ២០២១ នៅវេលាម៉ោង១១និង៣០នាទី ប្តីរបស់ខ្លួនបានហូបបាយជុំគ្នាជាមួយកូនស្រី ឈ្មោះធី យ៉តស៊ី អាយុ៧ឆ្នាំ នៅក្នុងបន្ទប់ចត្តាឡីស័កកំរិត០១ នៃអនុវិទ្យាល័យ​ព្រែកនរិន្ទ លុះរហូតដល់ម៉ោង១២និង០០នាទី ប្តីរបស់ខ្លួន បានសុំឲ្យប្រពន្ធនិងកូនរបស់ខ្លួនចេញទៅអង្គុយលេងខាងក្រៅក្រោមដើមច័ន្ទគិរី ដែលមានចម្ងាយ ១៥ម៉ែត្រ ពីបន្ទប់ស្នាក់នៅ លុះរហូតដល់ម៉ោង១៣​និង​១០នាទី ខ្លួនក៏បានដើរទៅបន្ទប់ដើម្បីមើលប្តី ពេលនោះខ្លួនបានឃើញប្តីចងក ដោយប្រើខ្សែកន្សែងក្រម៉ាការ៉ូពណ៌ស លាយពណ៌ក្រហម នៅនឹងឥដ្ឋប្រហោងក្នុងបន្ទប់ស្នាក់នៅស្លាប់បាត់ទៅហើយ ពេលនោះខ្លួនក៏ស្រែកឆោរឡោ ឲ្យក្រុមគ្រូពេទ្យ មកជួយ តែយឺតពេលទៅហើយ។

សពមានឈ្មោះ ថន ចាន់ធី ភេទប្រុស អាយុ៣៦ឆ្នាំ មុខរបរកម្មករកសិកម្ម មកពីប្រទេសថៃ រស់នៅភូមិសួសអី ឃុំពាមឯក ស្រុកឯកភ្នំ ខេត្តបាត់ដំបង។ តាមការបញ្ជាក់ពីប្រពន្ធរបស់ជនរងគ្រោះបានឲ្យដឹងថា កាលនៅប្រទេសថៃ ប្តីរបស់ខ្លួន(សព)បានផឹកថ្មាំបាញ់ស្មៅ ដើម្បីសម្លាប់ខ្លួន  ហើយក៏បានព្យាយាមធ្វើអត្តឃាត(ចងក)ជាច្រើនដងមកហើយ តែប្រពន្ធជួយឃាត់បាន។ ដោយមូលហេតុមានជម្ងឺរសរសៃរប្រសាទ។

ក្រោយពីក្រុមគ្រូពេទ្យ បានយកសំណាកទៅធ្វើតេស្ត  ឃើញថាអវិជ្ជមាន ជម្ងឺរ Covid-19 សពបានប្រគល់អោយទៅក្រុមគ្រួសារ យកទៅធ្វើបុណ្យតាមប្រពៃណី៕

អត្ថបទ៖ សោ និយមរ័ត្ន