ឆ្នាំនេះទុរេនស្រុកស្ទឹងត្រង់ថយចុះរហូត៥០ភាគរយ ឯឈ្មួញខ្លះយកទុរេនផ្សេងមកបន្លំ

កំពង់ចាម៖ កសិករដាំទុរេននៅស្រុកស្ទឹងត្រង់ ខេត្តកំពង់ចាម បានលើកឡើងថា ចំពោះទិន្នផលឆ្នាំនេះមានការថយចុះពី៣០ភាគរយ ទៅ៥០ភាគរយ បើធៀបនឹងឆ្នាំមុន ហើយឈ្មួញកណ្តាលខ្លះទៀតលក់ទុរេនមិនមែនចម្ការបែកអន្លូងទៀត ធ្វើឱ្យតម្លៃធ្លាក់ចុះ។

ម្ចាស់ចម្ការធុរេន តាធីម យាយខាន់ ទំហំជាង១០ហិចតា ដែលមានទុរេនជិត ១,៥០០ដើម ក្នុងភូមិគីឡូ១០ ឃុំអក្សរត្នោត ស្រុកស្ទឹងត្រង់ បានបញ្ជាក់ឱ្យដឹងថា ក្នុងឆ្នាំនេះគឺចាប់ផ្តើមប្រមូលផលពីខែឧសភានេះ ប៉ុន្តែទិន្នផលដែលទទួលបានវិញគឺមានការធ្លាក់ចុះជាងរាល់ឆ្នាំ ដែលបណ្តាលមកពីការអាកាសធាតុ បើទោះបីកសិករខិតខំប្រឹងប្រែងថែទាំយ៉ាងណាក៏ដោយ។

ម្ចាស់ចម្ការបញ្ជាក់បន្តថា ម្យ៉ាងទៀតឈ្នួញកណ្តាលមួយចំនួនបានយកទុរេនតំបន់ផ្សេងមកលក់ដោយយកឈ្មោះ  ទុរេនបែកអន្លូង ដែលជា​អត្តសញ្ញាណទុរេនឆ្ញាញ់ប្រចាំតំបន់ ជាក់ស្ដែងឆ្នាំនេះនៅចម្ការតំបន់បែកអន្លូងនេះមិនសូវសំបូរដូចគេលក់តាមដងផ្លូវឡើយ។

សូមបញ្ជាក់ផងដែរថា នៅក្នុងខេត្តកំពង់ចាម ទុរេនដែលល្បីល្បាញ់មានរសជាតិឆ្ញាញ់ជាងគេនោះគឺ ទុរេនរបស់អ្នកភូមិបែកអន្លង់ ក្នុងឃុំអារក្សត្នោត ស្រុកស្ទឹងត្រង់ ដែលម្ចាស់ចំការនីមួយៗដាំដុះបែបធម្មជាតិ ហើយអ្វីដែលគួរឱ្យចាប់អារម្មណ៍នោះគឺថា នៅតំបន់នេះមានប្រភេទទុរេនដែលឆ្ងាញ់ពេញនិយមជាងគេ គឺប្រភេទម៉ាន់ថង៕

អត្ថបទ  និង  រូបភាព៖ ហុង ម៉េងហៀ