ព័ត៌មានជាតិ

អភិបាលខេត្តកំពង់ស្ពឺអនុញ្ញាតឲ្យអាជីវករចូលលក់ដូរនៅផ្សារត្រាំខ្នារថ្មីដោយឥតគិតថ្លៃរយៈពេល៦ខែ

បានផុស

៤ years មុន

នៅ

ថ្ងៃអង្គារ ១៨ ឧសភា ២០២១

ដោយ

លោក វ៉ី សំណាង អភិបាលខេត្តកំពង់ស្ពឺបានអនុញ្ញាតឲ្យអាជីវករលក់ដូរមិនរៀបរយនៅតាមទីសាធារណៈនានា និងតូបលក់ដូរចល័តនៅទីប្រជុំជននៅក្នុងឃុំជង្រុក ស្រុកគងពិសី ខេត្តកំពង់ស្ពឺ ទៅលក់នៅទីតាំងក្នុងដីឡូតិ៍សំណង់ផ្ទះល្វែងផ្សារត្រាំខ្នារថ្មីដោយមិនគិតគិតថ្លៃភាស៊ី និងប្រាក់ឈ្នួលសម្រាប់ទីតាំងរយៈពេល៦ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្តបានលើកឡើងនៅក្នុងសេចក្តីជូនដំណឹងចុះថ្ងៃទី១៧ ខែឧសភានេះថា ក្នុងន័យនេះ ដើម្បីឲ្យដំណើរការរៀបចំមានរបៀបរៀបរយសណ្តាប់ធ្នាប់សាធារណៈ និងនៅផ្សារសុវត្ថិភាពបណ្ដោះអាសន្នបានល្អប្រសើរ រដ្ឋបាលខេត្តកំពង់ស្ពឺសូមណែនាំដល់អាជីវករដែលធ្លាប់លក់ដូរមិនរៀបរយនៅតាមទីសាធារណៈនានា និងតូបលក់ដូរចល័តនៅទីប្រជុំជនក្នុងឃុំជង្រុក ស្រុកគងពិសីខេត្តកំពង់ស្ពឺទាំងអស់ ត្រូវទៅលក់ដូរនៅផ្សារសុវត្ថិភាពបណ្ដោះអាសន្ននៅតំបន់ដីឡូតិ៍សំណង់ផ្ទះល្វែងផ្សារត្រាំខ្នារថ្មី ចាប់ពីថ្ងៃទី១៩ ខែឧសភា ឆ្នាំ២០២១នេះ។

លោកអភិបាលខេត្តបានបន្តថា អាជីវករទាំងអស់ត្រូវរៀបចំឲ្យមានការលក់ដូរដោយរក្សាគម្លាតសុវត្ថិភាព និងត្រូវមានអាកុល ឬជែលសម្រាប់អតិថិជនលាងដៃ ទាំងអាជីវករ ទាំងអតិថិជន ត្រូវពាក់ម៉ាសឲ្យបានត្រឹមត្រូវ និងរក្សាគម្លាតសុវត្ថិភាពទាំងអស់គ្នា។

លោកអភិបាលខេត្តបានបញ្ជាក់ថា រដ្ឋបាលខេត្តមិនអនុញ្ញាតឲ្យអាជីវករដែលមានឈ្មោះក្នុងបញ្ជីកំពុងត្រូវបានយកសំណាក និងធ្វើចត្តាឡីស័ក ចូលប្រកបអាជីវកម្មក្នុងតំបន់ផ្សារសុវត្ថិភាពនេះឡើយ។

លោកអភិបាលខេត្តបានឲ្យដឹងថា ការឲ្យអាជីវករទៅលក់នៅកន្លែងថ្មីនេះ គឺក្នុងគោលបំណងដើម្បីរក្សាមុខរបរប្រចាំថ្ងៃរបស់ប្រជាពលរដ្ឋ និងការពារសុខមាលភាពសាធារណៈរបស់ប្រជាពលរដ្ឋដោយរក្សាបាននូវរបៀបរៀបរយ សណ្ដាប់ធ្នាប់សាធារណៈ ពិសេសចូលរួមទប់ស្កាត់ការឆ្លងរាលដាលជំងឺកូវីដ១៩។

គួរបញ្ជាក់ថា សំណង់ផ្ទះល្វែង និងផ្សារត្រាំខ្នារថ្មីដែលមានទំហំដីប្រមាណ៦ហិចតា ស្ថិតនៅភូមិក្របីត្រាំ ឃុំជម្រុក ស្រុកគងពិសី ខេត្ដកំពង់ស្ពឺ ក្រោមទុនវិនិយោគខ្ទង់លានដុល្លារ បានសម្ពោធបើកលក់ និងកក់ជាផ្លូវការហើយ កាលពីថ្ងៃទី២៨ ខែកក្កដា ឆ្នាំ២០១៩កន្លងទៅ៕

អត្ថបទ ៖ សំអឿន