ពាណិជ្ជកម្ម​ទ្វេ​ភាគី​កម្ពុជា-អាមេរិក នៅ​តែ​បន្ត​កើន​ឡើង​ជា​បន្តបន្ទាប់ ទោះ​ស្ថិត​ក្នុង​វិបត្តិ​កូវីដ-១៩

ពាណិជ្ចកម្មទ្វេភាគីកម្ពុជា-អាមេរិក​​នៅតែបន្តកើនឡើងជាបន្តបន្ទាប់ ទោះស្ថិតក្នុងវិបត្តិកូវីដ១៩។ នេះបើតាមការកត់សម្គាល់ ក្រោយពីជំនួបរវាងលោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ​ជាមួយលោក Patrick Murphy ឯកអគ្គរដ្ឋទូតសហរដ្ឋអាមេរិក​ប្រចាំ​កម្ពុជា កាលពីថ្ងៃទី១៧ ខែឧសភា ឆ្នាំ​២០២១។

លោកឧបនាយករដ្ឋមន្រ្តី និងលោកឯកអគ្គរដ្ឋទូត បានកត់សម្គាល់រួមលើចំណុចវិជ្ជមាននៃកិច្ចសហប្រតិបត្តិការរបស់ប្រទេសទាំងពីរ ដូចជាវិស័យពាណិជ្ជកម្ម និងការវិនិយោគ ដែលនៅតែមានការកើនខ្លាំងឡើងនៅឆ្នាំ​២០២០ និងដើមឆ្នាំ២០២១នេះ បើទោះបីជាមានបញ្ហាកូវីដ-១៩ យ៉ាងណាក៏ដោយ។

យោងតាមទីភ្នាក់ងារស្ថិតិអាមេរិក US Census Bureau ទោះស្ថិតក្នុងវិបត្តិកូវីដ១៩ ពាណិជ្ចកម្មទ្វេភាគីកម្ពុជា-អាមេរិក​​កើនឡើង៤.៤ភាគរយ ក្នុងរយៈពេល២ខែដំបូងក្នុងឆ្នាំ២០២១នេះ ពោលគឺមានទំហំជិត១.២ពាន់លានដុល្លារអាមេរិក ធៀបនឹងរយៈពេលដូចគ្នាក្នុងឆ្នាំ២០២០។ ទីភ្នាក់ងារស្ថិតិអាមេរិកបានបង្ហាញផងដែរថា កាលពីឆ្នាំ២០២០កន្លងទៅ ទំហំពាណិជ្ជកម្មរវាងប្រទេសទាំងពីរមានទំហំជិត៧ពាន់លានដុល្លារ កើនឡើងជាង១៧ភាគរយធៀបនឹងឆ្នាំ២០១៩។

ក្រៅពីវិស័យពាណិជ្ជកម្ម លោកឯកអគ្គរដ្ឋទូតអាមេរិកក៏បានបញ្ជាក់ផងដែរ អំពីជំនួយរបស់សហរដ្ឋអាមេរិកក្នុងទឹកប្រាក់ ១១លានដុល្លារអាមេរិក សម្រាប់ការប្រយុទ្ធប្រឆាំងនឹងជំងឺរាតត្បាតកូវីដ-១៩ នៅ​កម្ពុជា ព្រមទាំង​​ការប្ដេជ្ញារបស់សហរដ្ឋអាមេរិក ក្នុងការផ្ដល់ទឹកប្រាក់បួនពាន់លានដុល្លារអាមេរិកក្នុងក្របខណ្ឌវ៉ាក់សាំង COVAX របស់អង្គការសុខភាពពិភពលោក។

អត្ថបទ៖ កោះកែវ