ពលរដ្ឋ១៧១គ្រួសារ ទទួលបានផ្ទះស្នាក់នៅអចិន្ត្រៃយ៍ពីសម្តេច​តេជោ និងសម្តេចកិត្តិព្រឹទ្ធ​បណ្ឌិត

ថ្នាក់​ដឹក​នាំ​ខេត្តកណ្តាល នៅ​ថ្ងៃ​ទី​២១​ខែ​ ឧសភានេះ បាន​ចូល​រួម​ពិ​ធីប្រគល់​ផ្ទះ​អចិន្ត្រៃយ៍​ជូន​ប្រជា​ពលរដ្ឋ​ ចំនួន​១៧១ គ្រួសារ រស់​នៅ​ក្នុង​សំណង់​បណ្ដោះអាសន្ន លើ​ខ្នង​ទំនប់​៥៤ ៩២ ៩៤ ​ក្នុង​ទី​តាំង គម្រោង​សាងសង់​អាកាសយានដ្ឋាន អន្តរជាតិ​ភ្នំពេញថ្មី ស្ថិត​នៅ​ភូមិ​សាលាតាព្រហ្ម ឃុំ​បឹងខ្យាង ស្រុក​កណ្តាលស្ទឹង។

ពិធី​នេះ​មាន​វត្តមាន លោក ម៉ៅ ភិរុណ ប្រធានក្រុមប្រឹក្សាខេត្ត និងលោក គង់ សោភ័ណ្ឌ អភិបាលខេត្តកណ្តាល លោក បេងហុង សុជាតិខេមរ៉ូ អគ្គនាយក នៃអគ្គនាយកដ្ឋានលំនៅឋាន។

លោក​គង់ សោភ័ណ្ឌ បាន​បញ្ចាក់​ថា ពិធី​ប្រគល់​លំនៅ​ឋាន​អចិន្រ្តៃយ៍​ជូន​ប្រជា​ពលរដ្ឋ ១៧១​គ្រួសារ នា​ពេល​នេះ គឺ​បាន​បង្ហាញ​អំពី​ការ​គិតគូ យក​ចិត្ត​ទុក​ដាក់​ខ្ពស់​អំពីសិទ្ធិ​រស់រាន​មានជីវិត​ប្រកប​ដោយ​ភាព​ថ្លៃថ្នូរ ជីវភាព​ល្អ​ប្រសើរ​របស់​ប្រជាពលរដ្ឋ ក្រោម​ដំបូល​នៃសុខសន្តិភាព ការ​អភិវឌ្ឍ ក្រោម​ការ​ដឹក​នាំ​របស់​សម្តេចអគ្គមហាសេនាបតីតេជោ ហ៊ុន សែន នាយ​ករដ្ឋមន្រ្តីនៃព្រះរាជាណាចក្រកម្ពុជា។

លោក​បន្តថា នៅ​ពេល​គម្រោង​សាងសង់​ព្រលាន​យន្តហោះអន្តរជាតិថ្មី ស្ថិត​នៅ​ក្នុង​ដំណាក់​ការ​សាង​សង់ យើង​ប្រាកដ​ជា​ជួប​ប្រទះនូវបញ្ហាប្រឈមមួយចំនួនដូចជាផលប៉ះពាល់សង្គម និង​បរិស្ថាន​ជាដើម ប៉ុន្តែវាក៏ជាកាលានុវត្តភាពក្នុងការអភិវឌ្ឍសេដ្ឋកិច្ច របស់បងប្អូន​ប្រជាពល​រដ្ឋនៅ​មូលដ្ឋាន​ផងដែរ ដោយទំហំនៃការសាងសង់ព្រលានយន្តហោះថ្មីនេះ នឹងត្រូវការកម្លាំង ជំនាញ​ជា​ច្រើន​ពីបងប្អូនប្រជាពលរដ្ឋក្នុងមូលដ្ឋានច្រើន។

ជាមួយគ្នានេះ ឯកឧត្តមអភិបាលក៏បានថ្លែងអំណរគុណដល់បងប្អូនប្រជាពលរដ្ឋទាំងអស់ គ្រប់ភាគី​ពាក់ព័ន្ធ ដែលបានខិតខំចូលរួមដោះស្រាយ ទទួលយកនូវសំណងផលប៉ះពាល់​តាមគោល​ការណ៍​របស់​រាជរដ្ឋាភិបាល ដើម្បីផ្តល់លទ្ធភាពជូនរាជរដ្ឋាភិបាល ក៏ដូចជាក្រុមហ៊ុនអាកាសយានដ្ឋាន​អន្តរ​ជាតិថ្មី បន្តនូវការអភិវឌ្ឍការសាងសង់ព្រលានយន្តហោះថ្មីនេះ ដែលនឹងជួយជម្រុញកំណើន​សេដ្ឋ​កិច្ច​ជាតិ និងប្រជាពលរដ្ឋនៅមូលដ្ឋាន នាពេលខ្លីខាងមុខ។

លំនៅឋានអចិន្ត្រៃយ៍នេះមានទំហំ ៥ម៉ែត្រ x ៨ម៉ែត្រ លើផ្ទៃដី ៥ម៉ែត្រ×២០ម៉ែត្រ ដែលសាងសង់តាមប្លង់ស្ថាបបត្យកម្មដោយរក្សាគម្លាតផ្នែកខាងមុខ ៥,៥ម៉ែត្រ និងគម្លាតខាងក្រោយ ៦,៥ម៉ែត្រ ដើម្បីឱ្យគ្រួសារប្រជាពលរដ្ឋ អាចសាងសង់សំណង់បន្ថែម នៅលើទីតាំងដីឡូតិ៍ផ្នែកក្រោយ ក្នុងទំហំអតិប្បរមា ៣,៥ម៉ែត្រ x ៤,៥ម៉ែត្រ ដែលមានគម្លាត ពីរបងដីខាងក្រោយ១ម៉ែត្រ។

ការសាងសង់លំនៅឋាននេះ គឺមានការចុះតាមដានត្រួតពិនិត្យ ជាប្រចាំពី ក្រុមការងារបច្ចេកទេស នៃអគ្គនាយកដ្ឋានបច្ចេកទេសលំនៅឋាន ដើម្បីធានានូវគុណភាព ។

កាលពីខែមករា ឆ្នាំ២០១៨ ប្រមុខរាជរដ្ឋាភិបាលកម្ពុជា បានអនុញ្ញាតឱ្យមានការសាងសង់​អាកាសយានដ្ឋានអន្តរជាតិថ្មី ដើម្បីជំនួសអាកាសយានដ្ឋានអន្តរជាតិភ្នំពេញពោធិ៍ចិនតុង ដែលមាន​ផ្ទៃ​ក្រឡាត្រឹមតែ ៤០០ហិកតា និងអាចទទួលអ្នកដំណើរបានត្រឹមប្រមាណ៥លាននាក់។

រាជរដ្ឋាភិបាលកម្ពុជា បានជ្រើសរើសភូមិសាស្រ្ត​ខេត្តកណ្តាល និងមួយផ្នែកនៃខេត្តតាកែវ ដើម្បីធ្វើការសាងសង់អាកាសយានដ្ឋានអន្តរជាតិថ្មីលំដាប់4F ដែលមានទំហំសរុប ២៦០០ហិកតា ក្នុងនោះស្ថិតក្នុងភូមិសាស្រ្តខេត្តកណ្តាល មានទំហំ ២ ២១២.៣ហិកតា ឆ្លងកាត់ស្រុកចំនួនពីរ គឺស្រុកកណ្តាលស្ទឹង និងស្រុកស្អាង។ អាកាសយានដ្ឋានអន្តរជាតិ​ថ្មី​នេះ នឹងមានសមត្ថភាពទទួលអ្នកដំណើរបានរហូតដល់ ៤៥ លាននាក់ នៅពេលបញ្ចប់ការសាងសង់ទាំងស្រុងនៅក្នុងឆ្នាំ២០៥០៕