កម្លាំង​ការពារ​ព្រំដែន​វៀតណាម ផ្ដល់​សម្ភារៈ​បរិក្ខារ​ពេទ្យ ជូន​អាជ្ញាធរ​ខេត្ត​ចំនួន​ពីរ​របស់​កម្ពុជា

ស្ថានទូតវៀតណាមប្រចាំកម្ពុជា បានឲ្យដឹងនៅរសៀលថ្ងៃទី១៤ ខែវិច្ឆិកានេះថា នៅច្រកព្រំដែន ខាញបិញ និងច្រកព្រំដែនអន្តរជាតិ តិញបៀន បញ្ជាការដ្ឋាននៃកងកំលាំងការពារព្រំដែនខេត្តអានយ៉ាង នៃប្រទេស​វៀត​ណាម បានប្រគល់អំណោយជា​សម្ភារៈ​បរិក្ខារ​ពេទ្យ គ្រឿង​ឧបភោគ បរិភោគ សម្រាប់​បង្ការ ទប់ស្កាត់​ជំងឺ​កូវីដ-១៩ ដល់ខេត្តចំនួនពីរ នៃប្រទេសកម្ពុជា គឺខេត្តកណ្តាល និងខេត្តតាកែវ ដែលមាន​តម្លៃ​សរុប​ប្រមាណ​ជិត១ពាន់លានដុង។

បើតាមស្ថានទូតវៀតណាមប្រចាំកម្ពុជា ពិធីប្រគល់ និងទទួលបានធ្វើឡើងកាលពីថ្ងៃទី១២ ខែវិច្ឆិកា ដោយ​មានការចូលរួមពីលោក នៃ ចារី អភិបាលរងខេត្តកណ្តាល។

ស្ថានទូតបញ្ជាក់ថា នៅ​ច្រក​និមួយៗ​ តំណាង​បញ្ជា​ការដ្ឋាន​កង​ការពារ​ព្រំដែនខេត្តអានយ៉ាង បានប្រគល់​ជូនម៉ាសពេទ្យចំនួន១លានម៉ាស ជែលចំនួន១,០០០ដប ស្ករស២,០០០គីឡូ ប្រេងឆា២,០០០ដប ប៊ីចេង​២,០០០កញ្ចប់ មីកញ្ចប់ចំនួន​​៦,០០០ និងថ្នាំពេទ្យមួយចំនួនទៀត ដល់កង​កម្លាំង​ប៉ូលីស, តំបន់​ប្រតិបត្តិ​ការ​សឹករង, កងអាវុធហត្ថ, កងវរសេនាតូចនគរបាលការពារព្រំដែនលេខ៦០៣, ៦០៥, កងវរសេនា​តូច​កងការពារព្រំដែនលេខ០១, កងវរសេនាធំលេខ៦០១ របស់ខេត្តទាំងពីរ ដើម្បីប្រើប្រាស់ក្នុងការបង្ការ និង​ទប់ស្កាត់ជំងឺកូវីដ-១៩ និងជួយ​ឧបត្ថម្ភ​ដល់​ប្រជាជន​រងគ្រោះ​ដោយ​សារ​ទឹកជំនន់៕

​អត្ថបទ ៖ កោះកែវ