ព័ត៌មានជាតិ

ឈប់ប្រថុយផឹកស្រាសទៀតទៅ! មនុស្ស៨នាក់ស្លាប់ និង៣៣នាក់ទៀត កំពុងសង្គ្រោះបន្ទាន់

បានផុស

៤ years មុន

នៅ

ថ្ងៃចន្ទ ២៤ ឧសភា ២០២១

ដោយ

មនុស្ស៨នាក់(ក្នុងនោះស្រី២នាក់)បានស្លាប់ជាបន្តបន្ទាប់ និង៣៣នាក់ទៀត ត្រូវបានដឹកមកកាន់មន្ទីរពេទ្យ ក្នុងករណីសង្ស័យពុលស្រា នៅចំណុចភូមិធ្នង់ ឃុំឫស្សីស្រុកខាងកើត ស្រុកកំពង់ត្រាច ខេត្តកំពត។ អ្នកភូមិអះអាងថា កាលពីយប់ថ្ងៃទី២១ ខែឧសភា ឆ្នាំ២០២១ ពលរដ្ឋចំនួន ដូចរៀបរាប់ខាងលើ បានទៅចូលរួមកំដរសពអ្នកភូមិ និងមានការផឹកស្រាស ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លុះហូបចុកបានបន្តិច ក៏ស្រាប់តែអ្នកខ្លះមានអាការៈចុកពោះ ក្អួតចង្អោរ ទើបសាច់ញាតិដឹកមកកាន់មន្ទីរពេទ្យដើម្បីជួយសង្គ្រោះ។ ជាអកុសល នៅយប់ថ្ងៃទី២១ ខែឧសភា នោះមានពលរដ្ឋម្នាក់ស្លាប់។ លុះចូលដល់ព្រឹកថ្ងៃទី២៣ ខែឧសភា ស្លាប់២នាក់ទៀត ដល់ថ្ងៃទី២៤ ខែឧសភា ក៏មានអ្នកស្លាប់រហូតដល់៥នាក់ទៀត។ សរុបអ្នកស្លាប់បើគិតមកដល់រសៀល ២៤ ឧសភានេះ គឺមានចំនួន ៨នាក់ ឯអ្នកកំពុងសម្រាកព្យាបាលមានចំនួន ៣៣នាក់។

ក្រោយពីមានករណីពលរដ្ឋមានអាការៈក្អួតចង្អោរ រហូតមានអ្នកស្លាប់បែបនេះ អាជ្ញាធរ មានក្រុមគ្រូពេទ្យបង្អែកស្រុកកំពង់ត្រាច និងនគរបាលខេត្តកំពត រួមទាំងនគរបាលស្រុកនិងអភិបាលស្រុកកំពង់ត្រាច បានចុះមកពិនិត្យដល់លំនៅឋានសពនីមួយៗ៕ ដោយ ៖ សេង ណារិទ្ធ