ព្រឹកនេះ អាជ្ញាធរខណ្ឌដូនពេញចុះបាញ់ថ្នាំសម្លាប់មេរោគក្នុងវត្តសារាវ័នតេជោ

ព្រឹកថ្ងៃទី២៥ ឧសភា ២០២១នេះ អាជ្ញាធរខណ្ឌដូនពេញ បានសហការជាមន្ត្រីជំនាញ ចុះបាញ់ថ្នាំសម្លាប់មេរោគឆ្លង ក្នុងបរិវេណវត្តសារាវ័នតេជោ ស្ថិតនៅផ្លូវលេខ១៧៨ ភូមិ៦ សង្កាត់ជ័យជំនះ ខណ្ឌដូនពេញ រាជធានីភ្នំពេញ។ ប្រតិបត្តិការបាញ់ថ្នាំសម្លាប់មេរោគឆ្លងនេះ ក្រោយពីការចុះយកសំណាកព្រះសង្ឃ និងពុទ្ធបរិស័ទចំណុះជើងវត្ត ដែលពាក់ព័ន្ធផ្ទាល់ និងប្រយោល នឹងអ្នកវិជ្ជមានដែលជានិស្សិតពេទ្យ និងជាងភ្លើងស្នាក់នៅក្នុងវត្ត កាលពីម្សិលមិញ។

ជាមួយគ្នានោះ អនុគណៈកម្មការស្រាវជ្រាវជំងឺកូវីដ១៩ ក៏បានអំពាវនាវដល់ ប្រជាពលរដ្ឋពុទ្ធបរិស័ទ ព្រះសង្ឃ សិស្សនិស្សិត ដែលធ្លាប់បានទៅប្រាស្រ័យទាក់ទងនឹងអ្នករស់នៅក្នុងវត្តសារាវ័នតេជោ ជាពិសេសអ្នកដែលបានចេញចូលជាញឹកញាប់ ឬមានទំនាក់ទំនងជាមួយ កុដិលេខ ២៥ ប្រសិនបើ មានរោគសញ្ញាដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ ទៅធ្វើតេស្តរកមេរោគ កូវីដ១៩ ជាបន្ទាន់៕ អត្ថបទ៖ រស្មី