តើ TESLA ម៉ាក​រថយន្ត​អគ្គិសនី​ដ៏​ល្បី​របស់​អាមេរិក​ពិត​ជា​បាន​ផ្ដល់​សិទ្ធ​លក់​រថយន្ត​នៅ​កម្ពុជា​មែន​ឬ​ទេ?

ក្រសួងពាណិជ្ជកម្មកំពុងពិភាក្សា និងសហការជាមួយតំណាងក្រុមហ៊ុនTESLAនៅសឹង្ហបុរី ដើម្បីយល់កាន់តែច្បាស់ និងដឹងការពិតអំពីថាតើពិតជាមានការផ្ដល់សិទ្ធលក់រថយន្តមកឱ្យភាគីណាមួយនៅក្នុងប្រទេសកម្ពុជាមែនឫទេ។ នេះបើតាមការឱ្យដឹងពី ឯកឧត្តម ឡុង កែវវិចិត្រ អ្នកនាំពាក្យក្រសួងពាណិជ្ជកម្ម។

ឯកឧត្តម ឡុង កែវវិចិត្រ បានបញ្ជាក់ថា ប្រសិនបើក្រសួងរកឃើញថាមិនមានការផ្ដល់សិទ្ធលក់រថយន្ត TESLA មកឱ្យភាគីណាមួយនៅក្នុងប្រទេសកម្ពុជាទេនោះ ក្រសួងនឹងបន្តនិតិវិធីធ្វើយ៉ាងណាដើម្បីការពារកម្មសិទ្ធរបស់ម្ចាស់ម៉ាក ដើម្បីពង្រឹងការអនុវត្តច្បាប់កម្មសិទ្ធបញ្ញានៅក្នុងប្រទេសកម្ពុជា។ ម្យ៉ាងទៀត វាជាការលើកទឹកចិត្តដល់ក្រុមហ៊ុនបរទេសដែលជាម្ចាស់ម៉ាក មកចុះបញ្ជីដើម្បីមានការការពារសិទ្ធនៅក្រោមច្បាប់ ឱ្យមកវិនិយោគនៅកម្ពុជាកាន់តែច្រើន។

TESLA គឺជាក្រុមហ៊ុនរថយន្តអគ្គិសនីដ៏ល្បីល្បាញមួយរបស់សហរដ្ឋអាមេរិក ដែលបង្កើតឡើងនៅឆ្នាំ២០០៣ ដោយលោក Elon Musk ។ កន្លងមក គេឃើញមានក្រុមហ៊ុនលើកស្លាកយីហោ TESLA ស្ថិតនៅតាមបណ្ដោយមហាវិថីសហព័ន្ធរុស្សី (១១០) សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ដែលក្រសួងពាណិជ្ជកម្មអះអាងថា មិនទាន់បានចុះបញ្ជីពាណិជ្ជកម្មតាមច្បាប់ត្រឹមត្រូវនោះទេ។

ដូច្នេះបានជា កាលពីថ្ងៃទី២៤ ខែឧសភា ឆ្នាំ២០២១ មន្ទីរពាណិជ្ជកម្មរាជធានីភ្នំពេញដឹកនាំដោយ លោក លី គង់ អនុប្រធានមន្ទីរ បានសហការជាមួយរដ្ឋបាលខណ្ឌពោធិ៍សែនជ័យ និងអាជ្ញាធរសង្កាត់កាកាបទី១ ចុះត្រួតពិនិត្យលើទីតាំងក្រុមហ៊ុនដែលមានស្លាកយីហោ TESLA ដែលមានទីតាំងខាងលើ ដើម្បីណែនាំឲ្យក្រុមហ៊ុនធ្វើការចុះបញ្ជីពាណិជ្ជកម្ម និងម៉ាករថយន្តរបស់ក្រុមហ៊ុន TESLA នៅក្រសួងពាណិជ្ជកម្ម និងស្នើសុំការអនុញ្ញាតលើកស្លាកយីហោនៅរដ្ឋបាលរាជធានីភ្នំពេញ។

គួរបញ្ជាក់ថា កម្ពុជាមានច្បាប់ស្ដីពីម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់ ដែលរដ្ឋសភាបានអនុម័តកាលពីខែធ្នូ ឆ្នាំ២០០១ ហើយព្រឹទ្ធសភាបានអនុម័តយល់ព្រមនៅខែមករា ឆ្នាំ២០០២។ នៅក្នុងជំពូកទី១ មាត្រា១ នៃច្បាប់នេះបានចែងថា ច្បាប់នេះមានបំណងការពារម៉ាក ពាណិជ្ជនាមដែលបានចុះបញ្ជីក្នុងបញ្ជីម៉ាក នៅក្នុងព្រះរាជាណាចក្រកកម្ពុជា និងប្រឆាំងការប្រកួតប្រជែងមិនស្មោះត្រង់លើការបង្កើត ការប្រើប្រាស់ម៉ាក និងពាណិជ្ជនាម។

បច្ចុប្បន្ន ក្រសួងពាណិជ្ជកម្មបាននឹងកំពុងពង្រឹងច្បាប់កម្មសិទ្ធបញ្ញា ដូចជាការចុះបញ្ជី និងការការពារម៉ាកដើម្បីលើកទឹកចិត្តអ្នកវិនិយោគមកបោះទុនរកស៊ីនៅកម្ពុជាឱ្យបានកាន់តែច្រើន។

អត្ថបទ៖ វ៉ាត វិន