ព័ត៌មានជាតិ

រោងចក្រ៤ ក្នុងខណ្ឌមានជ័យ ត្រូវអាជ្ញាធរចុះផ្អាកបណ្តោះអាសន្ន ក្រោយរកឃើញមានកម្មករកម្មការិនី ឆ្លងកូវីដ១៩ច្រើន

បានផុស

៤ years មុន

នៅ

ថ្ងៃព្រហស្បតិ៍ ២៧ ឧសភា ២០២១

ដោយ

រោងចក្រចំនួន៤ ក្នុងសង្កាត់ស្ទឹងមានជ័យ២ និងសង្កាត់ស្ទឹងមានជ័យ៣ នៃខណ្ឌមានជ័យ ត្រូវបានកម្លាំងអាជ្ញាធរចម្រុះខណ្ឌមានជ័យ សហការជាមួយមន្ត្រីក្រសួងការងារ នាវេលាព្រឹកថ្ងៃទី២៧ ខែឧសភា ឆ្នាំ២០២១ បានចុះពិនិត្យ និងសម្រេចផ្អាកដំណើរការ ជាបណ្តោះអាសន្នរយៈពេល២ថ្ងៃ ក្រោយរកឃើញមានបងប្អូនកម្មករកម្មការិនីរោងចក្រ ឆ្លងជំងឺកូវីដ១៩ច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះពិនិត្យ រួចសម្រេចផ្អាកដំណើរការសង្វាក់ផលិតកម្មរោងចក្រខាងលើ ធ្វើឡើងដោយមានការដឹកនាំកម្លាំងដោយលោក ឌី រ័ត្នខេមរុណ អភិបាលរងខណ្ឌមានជ័យ និងមានការសហការចូលរួមពីសំណាកមន្ត្រីក្រសួងការងារបណ្តុះបណ្តាល និងវិជ្ជាជីវៈ រួមជាមួយកម្លាំងអាជ្ញាធរមូលដ្ឋាននីមួយៗ មានកម្លាំងអាវុធហត្ថ នគរបាល និងលោកចៅសង្កាត់ផងដែរ។

យោងតាម តាមរបាយការណ៍មន្ត្រីអាជ្ញាធរខណ្ឌមានជ័យឲ្យដឹងថា រោងចក្រទាំង៤ពាក់ព័ន្ធដែលរកឃើញមានផ្ទុះខ្លាំងនូវជំងឺកូវីដ១៩ មានដូចជា ៖ ទី១. រោងចក្រ SLJ / ដេ ស៊ី ណៃ ស្ថិតនៅភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ ដែលមានកម្មករសរុប ៦៣០នាក់ ក្នុងនោះដែររកឃើញ អ្នកវិជ្ជមានមេរោគកូវីដ១៩ សរុប២២៣ នាក់ ១០៩ករណីថ្មី ( ១០៩ករណីថ្មី , ១១៤ ករណីចាស់ ) ។

ទី២. រោងចក្រ គូ តាយហ័រ សេងស៊ីងហ្វេងជីង ស្ថិតលើផ្លូវឌួងងៀប ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ ដែលមានកម្មករសរុប ៧១០នាក់ ស្រី៤៧៣នាក់ ក្នុងនោះដែររកឃើញអ្នកវិជ្ជមានមេរោគកូវីដ១៩ សរុប៣៩ នាក់ ( ៦ករណីថ្មី , ៣៣ករណីចាស់ ) ។

ទី៣. ក្រុមហ៊ុន ជុង ហាវ ហ្គាមេន CHOUNG HAO GARMENT CO., LTD. មានអាសយដ្ឋានស្ថិតនៅ ភូមិភ្នាត សង្កាត់ស្ទឹងមានជ័យទី២ ខណ្ឌមានជ័យ ដែលមានកម្មករសរុប ៥៧០នាក់ ក្នុងនោះដែររកឃើញវិជ្ជមាន មេរោគកូវីដ១៩ សរុប១៨នាក់ ( ១៦ករណីថ្មី , ០២ករណីចាស់ ) ។

ទី៤. រោងចក្រ WND ដែលមានទីតាំងស្ថិតតាមបណ្តោយផ្លូវលេខ២១៧ ស្ថិតក្នងភូមិឫស្សី២ សង្កាត់ស្ទឹងមានជ័យ៣ ខណ្ឌមានជ័យ ដែលមានកម្មករសរុប ៨៦៤នាក់ ស្រី ៧៦៥នាក់ ក្នុងនោះដែរ រកឃើញអ្នកវិជ្ជមាន មេរោគកូវីដ-១៩ ១២ នាក់ ( ៤ករណីថ្មី , ៨ករណីចាស់ ) ។

ក្រោយពីបានពិនិត្យរួច លោក ឌី រ័ត្នខេមរុណ អភិបាលរងខណ្ឌមានជ័យ និង លោក ទូច សុទ្ធមុត ប្រធានអន្តរាគមន៍ តំណាងក្រសួងការងារ និងបណ្តុះបណ្តាលវិជ្ជាជីវៈ បានសម្រេចផ្អាកដំណើរការ រោងចក្រទាំង៤ រយៈពេល២ថ្ងៃ គឺគិតចាប់ពេលចុះអនុវត្តខាងលើ រហូតដល់ថ្ងៃទី៣០ ខែឧសភា ឆ្នាំ២០២១ ជាបណ្តោះអាសន្ន។

លោក ឌី រ័ត្នខេមរុណ អភិបាលរងខណ្ឌឲ្យដឹងថា ក្រោយផ្អាករយៈពេល២ថ្ងៃហើយនោះ តំណាង ឬម្ចាស់រោងចក្រទាំង៤ខាងលើ ត្រូវរង់ចាំការចុះពិនិត្យ វាយតម្លៃរបស់ក្រសួងការងារ និងបណ្តុះបណ្តាលវិជ្ជាជីវៈ ពីហានិភ័យជាក់ស្តែងនៅក្នុងរោងចក្រផ្ទាល់ជាមុនសិន មុនឈានដល់សម្រេចជាថ្មី ក្នុងការអនុញ្ញាតឲ្យដំណើរការជាធម្មតាឡើងវិញ។

លោកអភិបាលរងខណ្ឌ បានបញ្ជាក់ថា ក្រោយពីបានធ្វើកិច្ចសន្យាជាមួយម្ចាស់រោងចក្រទាំង៤ឲ្យផ្អាកអាជីវកម្មរួច អាជ្ញាធរក៏សម្រេចឲ្យផ្អាកដំណើរការសង្វាក់ផលិតកម្មរោងចក្រភ្លាមៗផងដែរ ពោលគឺនៅព្រឹកថ្ងៃខែដដែល អាជ្ញាធរបានណែនាំឲ្យបងប្អូនកម្មករកម្មការិនីទាំងអស់ត្រឡប់ទៅកាន់លំនៅឋាន និងសូមតាមដានបន្តនូវអាការៈសុខភាពខ្លួន ក្នុងករណីដែលបងប្អូនកម្មករណាដែលមិនទាន់បានធ្វើសំណាកសូមទៅធ្វើសំណាក ដើម្បីតេស្តរកមេរោគកូវីដ១៩ នៅតាមទីតាំងដែលអាជ្ញាធរ និងក្រសួងបានរៀបចំសម្រាប់ការធ្វើតេស្តជូនបងប្អូន។ ទន្ទឹមនឹងនោះ អាជ្ញាធរ ក៏បានធ្វើការណែនាំអោយកម្មករទាំងអស់ សូមដាក់ខ្លួនឲ្យនៅដាច់ដោយឡែកផងដែរ អំឡុងពេលដែលលទ្ធិផលសំណាកមិនទាន់ចេញ ជៀសវាងការដើរហើរទៅខាងក្រៅ មានហានិភ័យក្នុងការចម្លងកាន់តែខ្ពស់ផងដែរ។

គួរបញ្ជាក់ផងដែរថា សម្រាប់ភូមិសាស្ត្រខណ្ឌមានជ័យមាន៧សង្កាត់ ក្នុងនោះ៦សង្កាត់ គឺត្រូវបានចាត់ទុកជា « តំបន់លឿន » ទៅហើយ ដែលជាតំបន់មានហានិភ័យតិច នៃការឆ្លងជំងឺកូវីដ១៩។ ក្នុងនោះដែរ នៅឡើយតែតំបន់មួយចំនួនក្នុងភូមិសាស្ត្រសង្កាត់ស្ទឹងមានជ័យ៣ប៉ុណ្ណោះ ដែលត្រូវអាជ្ញាធរនៅកំណត់បន្តថា ជា « តំបន់លឿងទុំ » ដែលជាមានតំបន់មានការឆ្លងក្នុងកម្រិតមធ្យម។ ប៉ុន្តែប៉ុន្មានថ្ងៃក្រោយមកនេះ បែរជារកឃើញមានការចម្លងហាក់កើនឡើងវិញផងដែរ ជាក់ស្តែងដូចករណីឆ្លងនៅក្នុងរោងចក្រខាងលើជាដើម៕

អត្ថបទ៖ លីហេង

សូមចុចអាន៖ រដ្ឋបាលខណ្ឌមានជ័យបញ្ឈប់កម្លាំងសណ្តាប់ធ្នាប់ដែលធ្វើខុសនីតិវិធីណែនាំ