ព្រះ​មហាក្សត្រ​សព្វព្រះរាជហឫទ័យ​ព្រះ​បរម​រាជានុញ្ញាត​ប្រោស​ព្រះរាជទាន​ជូន សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន អញ្ជើញ​ចូល​ក្រាបថ្វាយបង្គំ​គាល់ ដើម្បី​ថ្វាយព្រះពរ និង​ថ្វាយ​របាយការណ៍​ស្តីពី​សមិទ្ធផល

ភ្នំពេញ ៖ នា​វេលា​ព្រឹក​ថ្ងៃទី​២៨ ខែឧសភា ឆ្នាំ​២០២១ ព្រះករុណា​ជា​អ​ម្ចាស់ជីវិតលើត្បូង ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា និង​សម្តេចព្រះ​មហាក្សត្រី នរោត្តម មុនិនាថ សីហនុ ព្រះវររាជ​មាតា​ជាតិខ្មែរ ក្នុង​សេរីភាព សេចក្តីថ្លៃថ្នូរ និង​សុភមង្គល ព្រះប្រធាន​កិត្តិយស​កាក​បាទ​ក្រហម​កម្ពុជា ជាទីគោរព​សក្ការៈ​ដ៏​ខ្ពង់ខ្ពស់​បំផុត ព្រះអង្គ​ទាំង​ទ្វេ​សព្វព្រះរាជហឫទ័យ​ព្រះ​បរម​រាជានុញ្ញាត​ប្រោស​ព្រះរាជទាន​ជូន សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា និង​គណៈប្រតិភូ អញ្ជើញ​ចូល​ក្រាបថ្វាយបង្គំ​គាល់ ដើម្បី​ថ្វាយព្រះពរ និង​ថ្វាយ​របាយការណ៍​ស្តីពី​សមិទ្ធផល និង​វឌ្ឍនភាព​សកម្មភាព​ការងារ​មនុស្សធម៌​រប​ស់​កាកបាទក្រហមកម្ពុជា ឆ្នាំ​២០២០-២០២១ នា​ព្រះមហា​ប្រាសាទ​ខេមរិន្ទ ព្រះបរមរាជវាំង​។

​ក្នុង​ឱកាស​ដ៏​ឧត្តុង្គឧត្តម​នោះ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន បាន​ក្រាប​ថ្វាយ​នូវ​តង្វាយ​ជា​ថវិកា​ចំនួន ៥០​ម៉ឺន​ដុល្លារ​អាមេរិក ថ្វាយ​ព្រះករុណា ព្រះមហាក្សត្រ និង ៥០​ម៉ឺន​ដុល្លារ ថ្វាយ​សម្តេចព្រះ​មហាក្សត្រី ព្រះវររាជ​មាតា​ជាតិខ្មែរ ដើម្បី​ចូលរួម​ដង្ហែ​តាម​នូវ​ព្រះរាជ​សកម្មភាព​ដ៏​ឧត្តុង្គឧត្តម និង​ជា​ប្រវត្តិសាស្ត្រ​របស់​ព្រះអង្គ​ទាំង​ទ្វេ ក្នុង​ការបំពេញ​ព្រះរាជ​សកម្មភាព​មនុស្សធម៌​ដ៏​វិសេសវិសាល ជួយ​ដល់​កូនចៅ​ប្រជានុរាស្ត្រ​ព្រះរាជាណាចក្រ​កម្ពុជា បន្ត​តាម​ព្រះរាជ​គំរូ​ដ៏​ថ្លៃថ្លា នៃ​ព្រះករុណា ព្រះ​បរម​រតន​កោដ្ឋ ជាទីគោរព​សក្ការៈ​ដ៏​ខ្ពង់ខ្ពស់​បំផុត ចាប់តាំងពី​សម័យ​សង្គម​រាស្ត្រនិយម​ដ៏​រុងរឿង​នៃ​យើង​៕