ហានិភ័យ! សាច់ញាតិកូនកំឡោះក្នុងពិធីភ្ជាប់ពាក្យក្នុងខេត្តព្រះវិហារវិជ្ជមានកូវីដ តែរកឃើញក្នុងខេត្តផ្សេងៗ

ប្រធានមន្ទីរសុខាភិបាលខេត្តព្រះវិហារ លោក គួង ឡូ បាន​ប្រាប់​កម្ពុជាថ្មី នៅ​ថ្ងៃទី ៣១ ខែ​ឧសភា​នេះថា សាច់ញាតិកូនកំឡោះដែលបានមកចូលរួមក្នុងពិធីភ្ជាប់ពាក្យ កាលពីថ្ងៃទី២៧ ខែ​ឧសភា ចំនួន ៤ នាក់ រកឃើញថាមានវិជ្ជមានកូវីដដែរ ប៉ុន្តែអ្នកទាំង៤ បាន​ចេញ​ផុត​ពី​ខេត្ត​ព្រះវិហារ ហើយរកឃើញនៅខេត្តកំពត និងខេត្តតាកែវ បន្ទាប់​ពីបញ្ចប់ពិធីភ្ជាប់ពាក្យ។

ទន្ទឹមគ្នានោះ អាជ្ញាធរ​ខេត្ត​ព្រះវិហារ បាន​ស្រាវ​ជ្រាវ​តាម​ដាន​រក​ឃើញ អ្នក​ប៉ះពាល់​ផ្ទាល់​ និង​ករណីផ្ទុះកូវីដ១៩​ ដែល​ជាប់​ពាក់​ព័ន្ធ​ក្នុង​ពិធីភ្ជាប់​ពាក្យ​គូ​ដណ្ដឹង​នៅ​ភូមិ​ធម្មជាតិ ឃុំ​ស្រអែម​ ស្រុក​ជាំ​ក្សាន្តជាង ៧០ នាក់​ និង​អ្នក​ពាក់ព័ន្ធ​ប្រយោលជាង ១៥០ នាក់ ផងដែរ៕ អត្ថបទ៖ deth leng