ព័ត៌មានជាតិ

តាមព័ត៌មាន ផ្លូវល្បឿនភ្នំពេញ-ព្រះសីហនុ សាងសង់សម្រេចបានជាង ៦០ភាគរយហើយ

បានផុស

៤ years មុន

នៅ

ថ្ងៃអង្គារ ១ មិថុនា ២០២១

ដោយ

គិតត្រឹមខែឧសភា គម្រោងផ្លូវល្បឿនលឿនភ្នំពេញ-ព្រះសីហនុបានសាងសង់សម្រេចបានជាង ៦០ ភាគរយហើយ។ នេះបើតាមប្រភពពីក្រុមហ៊ុនចិនដែលកំពុងសាងសង់។

គម្រោងស្ថាបនាផ្លូវនេះជាផ្នែកមួយដ៏សំខាន់់ ក្នុងការជួយលើកស្ទួយដល់សេដ្ឋកិច្ចប្រទេសកម្ពុជា ហើយក្លាយជាខ្សែផ្លូវតភ្ជាប់ពីរាជធានីភ្នំពេញទៅកាន់ក្រុងព្រះសីហនុ ជាប៉ូលសេដ្ឋកិច្ច និងទេសចរណ៍ដ៏មានសក្តានុពលរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ជាខ្សែផ្លូវទំនើបបំផុតពុំធ្លាប់មានពីមុនមកនៅក្នុងប្រវត្តិសាស្រ្តរបស់ប្រទេសកម្ពុជា។ នេះបើតាមការលើកឡើងរបស់រដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តមស៊ុន ចាន់ថុល។

ឯកឧត្តមបានលើកពីគុណតម្លៃសេដ្ឋកិច្ចនៃខ្សែផ្លូវនេះ ដែលនឹងដើរតួនាទីយ៉ាងសំខាន់ក្នុងការលើកកម្ពស់ប្រសិទ្ធភាពនៃការធ្វើដំណើរ និងសម្រួលដល់ការដឹកជញ្ជូនផលិតផល ដំណាំកសិផល និងផលិតផលកសិឧស្សាហកម្ម របស់ក្រុមហ៊ុនវិនិយោគ ជាពិសេសទៅទីផ្សារអន្តរជាតិតាមរយៈកំពង់ផែសមុទ្រអន្តរជាតិទឹកជ្រៅខេត្តព្រះសីហនុ។

គួរបញ្ជាក់ថា គម្រោងសាងសង់ផ្លូវល្បឿនលឿន រាជធានីភ្នំពេញ-ក្រុងព្រះសីហនុ បានចាយថវិកាជាង ២ ពាន់លានដុល្លារ ដែលបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ ដោយក្រុមហ៊ុន Cambodian PPSHV Expressway ប្រើរយៈពេលសាងសង់៤៨ខែ។

ផ្លូវនេះឆ្លងកាត់រាជធានីភ្នំពេញប្រមាណ ៨ គីឡូម៉ែត្រ កណ្តាលប្រវែងប្រមាណ ៩ គីឡូម៉ែត្រ កំពង់ស្ពឺប្រវែងប្រមាណ ៨០ គីឡូម៉ែត្រ កោះកុងប្រវែងប្រមាណ ២ គីឡូម៉ែត្រ និងខេត្តព្រះសីហនុប្រវែងប្រមាណ ៨៩ គីឡូម៉ែត្រ៕

Related Topics:ហេដ្ឋារចនាសម្ព័ន្ធ