ព័ត៌មានជាតិ

ផ្លូវជាតិលេខ ៣ រលោងស្រិល សូមកុំឲ្យមានភក់ជ្រាំតាមដងផ្លូវ ក្រសួងទទូចបងប្អូន ជួយថែរក្សាអនាម័យ

បានផុស

៣ years មុន

នៅ

ថ្ងៃព្រហស្បតិ៍ ៣ មិថុនា ២០២១

ដោយ

ផ្លូវជាតិលេខ ៣ ដែលស្ថាបនាសម្រេចបានជាង ៩០ ភាគរយ បានក្រាលដោយកៅស៊ូយ៉ាងរលោងស្អាត។ យ៉ាងណាសោភណភាព និងភាពស្រស់ស្អាតផ្លូវជាតិមួយខ្សែនេះអាចបាត់បង់ទៅវិញ បើសិនប្រជាពលរដ្ឋមិនចូលរួមថែរក្សាបរិស្ថាន នៅពេលទទួលបានផ្លូវល្អស្អាតហើយនោះ។

លោក ហ៊ាង សុទ្ធាយុត្តិ អ្នកនាំពាក្យ និងជាប្រធាននាយកដ្ឋាន ព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូនបានថ្លែងប្រាប់កម្ពុជាថ្មីថា ក្រសួងគ្មានអ្វីក្រៅពីទទូចសុំដល់បងប្អូនដែលរស់នៅអាស្រ័យផលអាជីវកម្មលើដងផ្លូវនេះ ចូលរួមថែរក្សាបរិស្ថានដើម្បីឲ្យដងផ្លូវជាតិមួយខ្សែនេះនៅតែរក្សាបានសោភណភាពស្ថិតស្ថេរយូរអង្វែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់យ៉ាងដូច្នេះថា តាមមុខផ្ទះរបស់បងប្អូន បើមានភក់ជ្រាំសូមចូលរួមជួយសម្អាត ឬបើអាចដាំរុក្ខជាតិដាំស្មៅលម្អបន្ថែមបង្កើតបានពណ៌បៃតង ដែលអាចលើកកម្ពស់សោភណភាពស្អាតល្អ ផ្តល់អារម្មណ៍ស្រស់ស្រាយសម្រាប់ការរស់នៅ និងការធ្វើដំណើរ។

លោក ហ៊ាង សុទ្ធាយុត្តិ សង្ឃឹមថាបងប្អូននឹងចូលរួមសហការជាមួយក្រសួង ក៏ដូចជាអាជ្ញាធរមានសមត្ថកិច្ច ថែរក្សាផ្លូវនេះបន្តបរិស្ថានស្រស់បំព្រង អាចប្រើប្រាស់បានយូរអង្វែង។

គួរបញ្ជាក់ថា គម្រោងធ្វើឱ្យប្រសើរឡើងផ្លូវជាតិលេខ៣ ពីភ្នំពេញទៅក្រុងកំពត សម្រេចបានជាង ៩៨% នៅសេសសល់តែការងារមួយចំនួនតូចប៉ុណ្ណោះ។ បច្ចុប្បន្នក្រសួងសាធារណការ និងដឹកជញ្ជូន កំពុងខិតខំប្រឹងប្រែងយកចិត្តទុកដាក់ពន្លឿនការងារ បំពាក់កាមេរ៉ាចាប់ល្បឿនយានយន្ត កាមេរ៉ាសុវត្ថិភាព ជញ្ជីងថ្លឹងទម្ងន់ក្រោមដី និងជញ្ជីងថ្លឹងទម្ងន់នៅក្នុងស្ថានីយ។ ផ្លូវនេះត្រូវបានដាំដើមរុក្ខជាតិ ផ្កា និងសួនស្មៅនៅចំកណ្តាលទ្រូងផ្លូវ ប្រកបដោយទេសភាពពណ៌បៃតងស្រស់ ដែលមិនត្រឹមតែអាចជួយបន្ថយភាពនឿយហត់របស់អ្នកបើកបរប៉ុណ្ណោះទេ ប៉ុន្តែថែមទាំងនាំមកនូវអារម្មណ៍ស្រស់ស្រាយ និងរីករាយសម្រាប់អ្នកដំណើរផងដែរ៕

Related Topics:ហេដ្ឋារចនាសម្ព័ន្ធ