ព័ត៌មានជាតិ

គ្រាប់មីនសញ្ញាលេខបូកជាច្រើនគ្រាប់ប្រជាកសិករប្រទះឃើញនៅក្នុងតំបន់អតីតសមរភូមិប្រយុទ្ធក្តៅក្នុងស្រុករតនមណ្ឌល

បានផុស

៤ years មុន

នៅ

ថ្ងៃសុក្រ ៤ មិថុនា ២០២១

ដោយ

បាត់ដំបង ៖ ប្រជាកសិករបានប្រទះឃើញគ្រាប់មីនសញ្ញាលេខបូកជាង១០គ្រាប់កប់នៅនឹងដីចម្ការក្នុងតំបន់អតីតសមរភូមិប្រយុទ្ធគ្នាក្តៅដែលគ្រាប់មីនទាំងនេះខាងសមត្ថកិច្ចជំនាញថា នៅមានគុណភាពនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯកសន និល អធិការនគរបាលស្រុករតនមណ្ឌលបានបញ្ជាក់ឲ្យដឹងថា យុទ្ធភណ្ឌមិនទាន់ផ្ទុះទាំងអស់ខាងលើនេះ ត្រូវបានប្រជាពលរដ្ឋប្រទះឃើញ ខណៈពេលដែលគាត់ភ្ជួរដីធ្វើចម្ការនៅលើថ្នាលចាស់ក្បែរទីទួលដើម្បីបន្តការដាំដុះដូចរាល់រដូវកាល។

ប្រភពដដែលបន្តថា តំបន់ដែលប្រជាកសិករប្រទះឃើញគ្រាប់មីនកប់នៅក្នុងដីនេះឋិតនៅត្រង់ចំណុចភូមិជីប៉ាងឃុំផ្លូវមាសស្រុករតនមណ្ឌលខេត្តបាត់ដំបង។ ជាទីតាំងចាស់អតីតសមរភូមិប្រយុទ្ធយ៉ាងក្តៅគគុកដែលលោកធ្លាប់ឈរជើងការពារបូរណភាពដែនដីនៅអំឡុងរវាងឆ្នាំ១៩៨៨កន្លងមក។

មន្ត្រីនគរបាលដែលជាប់ប្រវត្តិការពារតំបន់ប្រទាញប្រទង់រូបនេះបានបន្តថា គ្រាប់មីនដែលប្រជាកសិករប្រទះឃើញដែលជាសំណល់ពីសម័យសង្គ្រាមជាយូរមកនេះមានសរុបចំនួន១២គ្រាប់វាជាប្រភេទគ្រាប់៧២Aនិងហៅម្យ៉ាងទៀតថាមីនស្គរឬមីនសញ្ញាលេខបូក។

ក្រោយពីកម្លាំងមូលដ្ឋានទទួលបានព័ត៌មានរាយការណ៍ពីប្រជាពលរដ្ឋឈ្មោះញៀ.ហឿនអាយុ៥៩ឆ្នាំលោកក៏បាននាំកម្លាំងជំនាញចុះទៅពិនិត្យជាក់ស្តែងដើម្បីសហការជាមួយមន្ត្រីអង្គភាពCMACរំដោះបោសសម្អាតហើយយកទៅកម្ទេចចោលតាមបច្ចេកទេសនៅពេលក្រោយ៕

ដោយ ៖ សៅ សារិទ្ធ