ព័ត៌មានជាតិ

ស្រវឹងស្រាចុះមុជទឹកទន្លេ ពេលប្ដីទៅមើល ឃើញស្លាប់បាត់

បានផុស

៣ years មុន

នៅ

ថ្ងៃអាទិត្យ ៦ មិថុនា ២០២១

ដោយ

Sokhom Khon

ស្ត្រីម្នាក់ផឹកស្រា និងហូបបាយជាមួយប្តី ហើយក៏នាំគ្នាចុះមុជទឹកទន្លេពេលប្តីឡើងមុនបន្តិចស្រាប់តែប្រពន្ធលង់ស្លាប់បាត់។

នគរបាលនៃអធិការនគរបាលខណ្ឌដូនពេញបានឲ្យដឹងថា ករណីមនុស្សលង់ទឹកស្លាប់នោះបានភ្ញាក់ផ្អើលកាលពីរសៀលថ្ងៃទី៥ ខែមិថុនា ឆ្នាំ២០២១ នៅចំណុចក្នុងទឹកទន្លេសាបត្រើយខាងលិច ផ្លូវព្រះស៊ីសុវត្ថិ ភូមិទី២ សង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ។

សពជនរងគ្រោះមានឈ្មោះ ទូន សុផាន ភេទស្រី ឆ្នាំកំណើត០២.០២.១៩៨៧ មុខរបរអ៊ុតសក់ ទីកន្លែងកំណើត ឃុំព្រែកពោធិ ស្រុកស្រីសន្ធរ ខេត្តកំពង់ចាម ។

បើតាមការបំភ្លឺរបស់ឈ្មោះ យ៉ត ផល ភេទប្រុស ឆ្នាំកំណើត១៩៧៩ ទីកន្លែងកំណើតស្រុកមោងឫស្សី ខេត្តបាត់ដំបង មុខរបរសន្តិសុខ(ប្ដីសព) បានបំភ្លឺថា កាលពីថ្ងៃទី៥ ខែមិថុនា ឆ្នាំ២០២១ វេលាម៉ោង០៩និង៤០នាទី ជនរងគ្រោះបានយកបាយមកឲ្យគាត់ហូបនៅកន្លែងគាត់យាម ពេលកំពុងហូបបាយជាមួយគ្នា ប្រពន្ធចង់ហូបស្រា រូបគាត់បានទៅទិញស្រាចំនួនកន្លះលីត្រ ឲ្យប្រពន្ធហូបបន្ទាប់មកប្រពន្ធក៏សុំគាត់ចុះទៅមុជទឹកទន្លេ ហើយគាត់ក៏បានជូនប្រពន្ធទៅដល់ច្រាំងទន្លេ ហើយក៏បានមុជទឹកទន្លេជាមួយគ្នា មួយសន្ទុះគាត់ក៏បានឡើងមកមុន ព្រោះប្រញាប់យកឯកសណ្ឋានសន្តិសុខទៅបោក ហើយត្រឡប់មកអង្គុយលេងក្បែរកន្លែងគាត់ធ្វើការវិញ។ ដោយបាត់ប្រពន្ធយូរពេកគាត់ក៏បានដើរទៅរក ពេលទៅកន្លែងកើតហេតុស្រាប់តែឃើញប្រពន្ធគាត់ផ្កាប់មុខក្នុងទឹកជាប់នឹងថ្ម រួចគាត់ក៏បានឈោងលើកចេញពីទឹក ហើយរត់មករាយការណ៍ជូនសមត្ថកិច្ចមូលដ្ឋានដើម្បីជ្រាបតែម្តង។ បុរសជាប្តីបញ្ជាក់ថា ប្រពន្ធគាត់ជាមនុស្សដែលញៀនស្រាជាប្រចាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីកើតហេតុកម្លាំងជំនាញខណ្ឌ និងប៉ុស្តិ៍បានចុះដល់ទីតាំងកើតហេតុ រួចរាយការណ៍ជូនព្រះរាជអាជ្ញារងអមសាលាដំបូងរាជធានីភ្នំពេញ និងសហការជាមួយគណៈបញ្ជាការឯកភាពខណ្ឌដូនពេញ មន្ទីរសុខាភិបាលរាជធានីភ្នំពេញ យកសំណាក និងការិយាល័យបច្ចេកទេសវិទ្យាសាស្ត្រ ការិយាល័យព្រហ្មទណ្ឌកំរិតធ្ងន់ និងពេទ្យអមសាលាដំបូងរាជធានីភ្នំពេញ ដើម្បីបង្កើតគណៈកម្មការធ្វើកោសល្យវិច័យ ពិនិត្យសពនិងកន្លែងកើតហេតុ។

ក្រោយចុះដល់កន្លែងកើតហេតុ និងឆ្លងតាមការពិនិត្យរបស់លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យរាជធានីភ្នំពេញ និងការិយាល័យជំនាញបច្ចេកទេសវិទ្យាសាស្ត្រកោសល្យវិច័យ នៃស្នងការដ្ឋាននគរបាលរាជធានីភ្នំពេញបានបញ្ជាក់ថា សពជនរងគ្រោះស្លាប់ដោយលង់ទឹក។

បច្ចុប្បន្នសពត្រូវបានប្រគល់ឲ្យបងស្រីបង្កើតឈ្មោះ ទូន សុភី ភេទស្រី អាយុ៥០ឆ្នាំ យកទៅធ្វើបុណ្យតាមប្រពៃណីនៅស្រុកកំណើត៕

អត្ថបទ ៖ រស្មី